bareilly: मोबाईल फोन वापरासंदर्भात शासनाकडून अनेक सूचना दिल्या जातात. विशेषत: फोन चार्जिंग करताना फोनवर बोलू नका अशा सूचना वारंवार सगळीकडे देण्यात येतात. अनेकदा या सूचनांकडे दुर्लक्ष केल्याने मोबाईलचे स्फोट घडून येतात. अशीच एक अंगाला शहारे सोडणारी एक घटना बरेलीमध्ये घडली आहे. ८ महिन्याच्या चिमुकलीचा मोबाईलचा स्फोट झाल्याने मृत्यू झालाय. (8 month baby died due to mobile blast)

माहितीनुसार, सोलर पॅनलद्वारे मोबाईल चार्ज होत असताना फोनची बॅटरी अति चार्ज होऊन गरम झाली आणि फोनचा स्फोट झाला. फोनचा स्फोट झाल्याने फोनच्या बाजूला असलेली ८ महिन्यांची चिमुकली गंभीररित्या भाजली गेली. कुटुंबियांनी तिला तात्काळ रूग्णालयात नेले परंतु तोवर या चिमुकलीचा मृत्यू झाला होता.

लावा कंपनीच्या मोबाईलमुळे घडली दुर्दैवी घटना

मोबाईलचा स्फोट होण्याच्या बऱ्याच घटना याआधीही घडल्या आहेत. बरेली मध्ये घडलेली ही घटना लावा कंपनीच्या फोनची असून यासंदर्भात कंपनी चौकशी करणार असल्याचे सांगितल्या जातेय. तसेच पीडित कुटुंबियांना हवी ती मदत करण्याबाबत दिलासाही कंपनीने दिला आहे.

का होतात मोबाईलचे ब्लास्ट ?

स्मार्टफोनमध्ये लिथियम आयन बॅटरी वापरली जाते. आणि स्मार्टफोनबाबत बोलायचे झाल्यास स्फोट होण्यास कारणीभूत असलेले सगळ्यात मोठे कारण म्हणजे मोबाईलची बॅटरी. तर काहीवेळा एक्स्टर्नल फोर्समुळेही ब्लास्ट होतो. या चिमुरडीबाबत घडलेल्या घटनेनंतर मात्र बरेली परिसरात सगळीकडे हळहळ व्यक्त केली जात आहे.