अमेठी : केंद्रीय मंत्री स्मृती इराणी यांनी आता काँग्रेसचे नेते राहुल गांधी यांच्यावर जोरदार टीका केली आहे. अमेठी लोकसभा मतदारसंघाशी कौटुंबिक नाते असल्याचा दावा करणाऱ्यांनी संसदेत या मतदारसंघाच्या समस्या कधीच मांडल्या नाहीत, अशी टीका त्यांनी केली आहे. ही टीका त्यांनी काँग्रेस नेते राहुल गांधी यांच्यावर त्यांचं नाव न घेताच केली आहे. विशेष म्हणजे याच मतदारसंघातून स्मृती इराणी यांनी २०१९ मधील लोकसभा निवडणुकीमध्ये राहुल गांधी यांचा पराभव केला होता. अमेठी हा गांधी कुटुंबीयांचा परंपरागत मतदारसंघ म्हणून ओळखला जातो.

अमेठीतील तिलोई परिसरातील बस स्थानकासह पाच कोटींच्या प्रकल्पांचे उद्‌घाटन इराणी यांच्या हस्ते झाले. त्यावेळी, त्या बोलत होत्या. यावेळी स्मृती इराणी म्हणाल्या की, अमेठीला वर्षानुवर्षे विविध समस्या भेडसावत आहेत. मात्र, या लोकसभा मतदारसंघाचे प्रतिनिधित्व करणाऱ्या खासदाराने फक्त मौन पत्करलं आहे. अमेठीशी कौटुंबिक नातं असल्याचा दावा करणाऱ्यांनी संसदेत या मतदारसंघाच्या समस्या कधीही मांडल्या नाहीत. त्यामुळे, अमेठीवासियांना वर्षानुवर्षे विकासापासून वंचित राहावे लागले, असा आरोपही त्यांनी केला आहे.

उत्तर प्रदेशात विकासकामे करण्याचा योगी आदित्यनाथ सरकारच्या दृष्टिकोनामुळे अवघ्या नऊ महिन्यांत अमेठीतील तिलोईतील बस स्थानक तयार झाल्याचा दावाही त्यांनी केला. तिलोईत वैद्यकीय महाविद्यालय उभारले जात असून कोरोनाचा सामना करण्यासाठी ऑक्सिजन प्रकल्प उभारल्याचेही त्यांनी सांगितले.