नवी दिल्ली : काँग्रेस अध्यक्ष सोनिया गांधी (Sonia Gandhi) यांना कोरोनाची लागण झाली आहे. कोरोनाबाधित काँग्रेस अध्यक्षांची पुनरावृत्ती चाचणी वेळेवर केली जाईल. मात्र, तोपर्यंत डॉक्टरांनी त्यांना विश्रांती घेण्याचा सल्ला दिला आहे. सोनिया यांनी नॅशनल हेराल्ड प्रकरणात ईडीसमोर (ED) हजर राहण्यासाठी तीन आठवड्यांचा वेळ मागितला आहे. मात्र, ईडीकडून अद्याप कोणतेही उत्तर आलेले नाही. एएनआय या वृत्तसंस्थेने सूत्रांच्या हवाल्याने ही माहिती दिली आहे. (Sonia Gandhi asked ED for three weeks time)

काँग्रेस अध्यक्ष सोनिया गांधी या महिन्यात कोरोनाच्या विळख्यात आल्या. कोरोनाची लागण होण्यापूर्वी सोनिया गांधी या मे महिन्यात राजस्थानमधील उदयपूर येथे आयोजित पक्षाच्या चिंतन शिबिरात सहभागी झाल्या होत्या. या कार्यक्रमात राहुल गांधींशिवाय पक्षाचे जवळपास सर्वच मोठे नेते सहभागी झाले होते.

सूत्रांवर विश्वास ठेवायचा झाल्यास, कोरोनाबाधित सोनिया गांधी (Sonia Gandhi) यांनी नॅशनल हेराल्ड प्रकरणात ईडीसमोर हजर राहण्यासाठी तीन आठवड्यांचा वेळ मागितला आहे. मात्र, ईडीकडून अद्याप कोणतेही उत्तर आलेले नाही. ईडीने सोनिया गांधी यांना ८ जून रोजी हजर राहण्याची नोटीस पाठवली होती. सोनिया गांधी आणि राहुल गांधी ईडीसमोर हजर होतील. कारण, त्यांच्याकडे लपवण्यासारखे काहीही नाही, असे काँग्रेसने बुधवारी (ता. ८) सांगितले.

राहुल गांधी गेल्या आठवड्यातच भारतात परतले

काँग्रेसचे (Congress) माजी अध्यक्ष राहुल गांधी (Sonia Gandhi) यांना कथित मनी लाँड्रिंगच्या प्रकरणात ईडीने १३ जून रोजी चौकशीसाठी बोलावले आहे. ईडीने (ED) यापूर्वी राहुल गांधींना २ जून रोजी हजर राहण्यास सांगितले होते. परंतु, त्यांनी देशाबाहेर असल्याचे सांगत हजर राहण्यासाठी आणखी काही तारखेची विनंती केली होती. राहुल गांधी गेल्या आठवड्यातच भारतात परतले.