दिल्ली : काँग्रेस अध्यक्षा सोनिया गांधी (Sonia Gandhi) यांनी उत्तर प्रदेश, उत्तराखंड, पंजाब, गोवा आणि मणिपूरच्या प्रदेश काँग्रेस कमिटीच्या अध्यक्षांना राजीनामे देण्यास सांगितलं आहे. प्रदेश काँग्रेसची पुनर्रचना करण्याच्या हेतूनं त्यांनी हे राजीनामे देण्यास सांगितल्याची माहिती पक्षाचे राष्ट्रीय प्रवक्ते रणदीप सुरजेवाला यांना सांगितलं आहे. तसंच आणखी काही महत्वाची पावलं देखील काँग्रेस (Congresss) उचलणार असल्याची माहिती मिळतेय.

पाच राज्यांच्या विधानसभा निवडणुकांचे निकाल १० मार्चला जाहीर झाले. उत्तर प्रदेश, पंजाब, गोवा, मणिपुर आणि उत्तराखंड या राज्यांचे निकाल जाहीर झाल्यानंतर देशभरातील राजकीय वातावरण ढवळून निघालं आहे. या सर्व निवडणूकांमध्ये काँग्रेसला (Congress) दारून पराभव स्विकारावा लागला आहे. एकूण पाच राज्यांत मिळून देखील काँग्रेसला शंभरी पार करता आलेली नाही. त्यानंतर पक्षाने काही मोठे निर्णय घेण्यास सुरुवात केली आहे. सोनिया गांधींनी पंजाबचे काँग्रेसचे प्रदेश अध्यक्ष नवज्योत सिंह सिद्धू, उत्तर प्रदेशचे अजय लल्लू, उत्तराखंडचे गणेश गोदियाल, गोव्याचे गिरीष चोडणकर आणि मनिपुरच्या एन. लोकेन सिंह यांना राजीनामे मागितले आहेत.

पंजाब वगळता इतर सर्व राज्यांत देखील काँग्रेसला मोठा पराभव स्वीकारावा लागला आहे. काँग्रेस पंजाबमध्ये १७, उत्तराखंडमध्ये २५, उत्तरप्रदेशमध्ये २, मणिपूर ९ तर गोव्यात १२ जागांवर विजय मिळवला आहे. त्यामुळे काँग्रेसला एकूण १०० जागा देखील मिळवता आलेल्या नाहीत. त्यानंतर आता पक्षश्रेष्ठींनी काही महत्वाचे निर्णय घेण्यास सुरुवात केली आहे.