श्रीनगर : उत्तर काश्मीरमधील सोपोर (Sopore Kashmir) इथं बुधवारी झालेल्या चकमकीत सुरक्षा दलांनी जैश-ए-मोहम्मदच्या (Jaish-e-Mohammed) दोन दहशतवाद्यांचा खात्मा केला. त्यापैकी एक विदेशी आहे. अंधाराचा फायदा घेत त्याचे साथीदार पळून गेले, त्यांचा शोध सुरू आहे.

या गोळीबारात एका गावकऱ्यालाही गोळी लागली असून, त्याच्यावर उपचार सुरू आहेत. पोलिसांना दिलेल्या माहितीनुसार, ऑटोमॅटिक शस्त्रांनी सज्ज दहशतवाद्यांचा एक गट त्यांच्या संपर्कातील एकाला भेटण्यासाठी सोपोरमधील बोम्मई इथं पोहोचला होता. लष्कराच्या 22 आरआर आणि सीआरपीएफच्या जवानांसह पोलिसांनी दहशतवाद्यांना पकडण्यासाठी ऑपरेशन केलं. संध्याकाळी 6.30 च्या सुमारास सुरक्षा दलांनी (Indian Army) गावाला वेढा घातला आणि शोध सुरू केला.

एका घरात लपलेल्या दहशतवाद्यांनी जवानांवर गोळीबार सुरू केला. प्रत्युत्तरादाखल केलेल्या कारवाईत एक दहशतवादी मारला गेला. काही वेळानं दुसरा दहशतवादीही मारला गेला. दरम्यान, अली मोहम्मद गनई या गावकऱ्याच्या पायाला गोळी लागलीय. जवानांनी दहशतवाद्यांना चारही बाजूंनी घेरलंय. रात्री उशिरापर्यंत गोळीबार सुरू होता. मंगळवारी देखील दक्षिण काश्मीरमधील शोपियानमध्ये सुरक्षा दलांनी केलेल्या चकमकीत लष्कर-ए-तौयबाचे तीन दहशतवादी ठार झाले. ठार झालेले तीनही दहशतवादी स्थानिक आहेत.