नवी दिल्ली : 'दि काश्मीर फाईल्स' हा सिनेमा चित्रपटगृहांमध्ये तुफान चालला आहे. या चित्रपटाच्या प्रमोशनसाठी भाजपनं खास कंबर कसली आहे. विविध ठिकाणी भाजपकडून लोकांना मोफत आणि सवलतीमध्ये हा चित्रपट दाखवला जात आहे. पण भाजपच्या या भूमिकेवर या चित्रपटाचे दिग्दर्शक विवेक अग्निहोत्री यांनी आक्षेप घेतला आहे. भाजप नेत्यांना फुकटात सिनेमा दाखवणं थांबवा, अशी मागणी त्यांनी केली आहे. (Stop showing free screening Kashmiri files movie to BJP leaders says Vivek Agnihotri)

अग्निहोत्री यांनी ट्विटद्वारे म्हटलं की, हरयाणातील रेवारी इथं भाजपच्या नेत्यांनी काश्मिर फाईल्स या सिनेमाचं मोफत शो आयोजित केला होता. पण ही बाब दिग्दर्शक विवेक अग्निहोत्री यांना रुचली नाही. त्यांनी म्हटलं की, लोकांना फुकटात सिनेमा दाखवणं हा फौजदारी गुन्हा आहे. यासाठी त्यांनी हरयाणाचे मुख्यमंत्री मनोहरलाल खट्टर यांना माझं आवाहन आहे की, त्यांनी हे थांबवावं. राजकीय लोकांनी कलात्मक व्यावसायाची कदर करावी. त्यासाठी कायदेशीररित्या आणि शांततेत सिनेमाचं तिकिट विकत घेऊन तो सिनेमागृहात जाऊन पाहावा, हीच खरी देशभक्ती आणि सामाजिक कार्य आहे.

अग्निहोत्री यांच्या ट्विटला उत्तर देताना हरयाणा भाजपचे प्रभारी अरुण यादव यांनी म्हटलं की, आपण संबंधीत भाजप नेत्यांना याबाबत सांगितलं असून अशा प्रकारे मोफत स्क्रिनिंग थांबवण्यास सांगितलं आहे. तसेच ज्यांना हा सिनेमा पहायचा असेल त्यांनी तो सिनेमागृहात जाऊन पाहावा असंही त्यांनी सांगण्यात आलं आहे.

दरम्यान, काश्मिर फाईल्स हा सिनेमा नव्वदच्या दशकात झालेल्या काश्मिरी पंडितांच्या विस्थापन घटनेवर आधारित आहे. या पिंडितांना दहशतवाद्यांच्या भीतीपोटी आपली राहती घरं सोडून काश्मीर खोऱ्यातून बाहेर पडावं लागलं होतं. या सर्व तत्कालिन घडामोडींचं चित्रण या सिनेमामध्ये करण्यात आलं आहे.