नवी दिल्ली : सर्वोच्च न्यायालयाचे (Supreme Court) न्यायमूर्ती एमआर शाह (६४) यांना गुरुवारी (ता. १६) हृदयविकाराचा झटका आला आहे. त्यांना तात्काळ हिमाचल प्रदेशातून हवाई रुग्णवाहिकेने दिल्लीत आणण्यात आले. त्यांना दिल्लीतील खासगी रुग्णालयात दाखल करण्यात येणार असल्याची माहिती आहे. त्यांची प्रकृती सध्या अत्यंत गंभीर असल्याचे सांगण्यात येत आहे. सुप्रीम कोर्टाचे वकील आणि भाजपचे प्रवक्ते गौरव भाटिया यांनी ही माहिती दिली आहे. (Supreme Court Justice MR Shah suffers heart attack)

एमआर शाह (MR Shah) यांना हिमाचल प्रदेशात हृदयविकाराचा झटका आला. आता न्यायमूर्ती शाह यांना हवाई रुग्णवाहिकेने दिल्लीला आणण्याची व्यवस्था केली जात आहे. ते लवकरात लवकर बरे व्हावेत ही ईश्वरचरणी प्रार्थना, असे ट्विट त्यांनी केले आहे. सर्वोच्च न्यायालय या प्रकरणी गृह मंत्रालयाच्या सतत संपर्कात आहे.

न्यायमूर्ती शाह (MR Shah) हे गुजरात उच्च न्यायालयाचे न्यायाधीशही राहिले आहेत. यानंतर त्यांची पाटणा उच्च न्यायालयाचे मुख्य न्यायाधीश म्हणून नियुक्ती करण्यात आली होती. त्यानंतर ते सर्वोच्च न्यायालयात न्यायाधीश झाले. एका प्रसंगी त्यांनी पंतप्रधान नरेंद्र मोदींचे कौतुक केले होते. मोदी हे लोकप्रिय, प्रिय आणि दूरदर्शी नेते असल्याचे शाह म्हणाले होते.

न्यायमूर्ती एमआर शाह यांनी १९ जुलै १९८२ रोजी वकील म्हणून नावनोंदणी केली. त्यांनी गुजरात उच्च न्यायालयात दिवाणी, फौजदारी, घटनात्मक, कर आकारणी, कामगार, सेवा आणि कंपनी प्रकरणांमध्ये सराव केला. तसेच जमीन, घटनात्मक, शिक्षण या विषयात स्पेशलायझेशन संपादन केले.

शाह यांची ७ मार्च २००४ रोजी गुजरात उच्च न्यायालयाचे अतिरिक्त न्यायाधीश म्हणून नियुक्ती करण्यात आली होती. २२ जून २००५ रोजी स्थायी न्यायाधीश म्हणून नियुक्ती. १२ ऑगस्ट २०१८ रोजी त्यांची पाटणा उच्च न्यायालयाचे मुख्य न्यायाधीश (Justice) म्हणून नियुक्ती करण्यात आली होती. २ नोव्हेंबर २०१८ रोजी त्यांची भारताच्या सर्वोच्च न्यायालयात (Supreme Court) नियुक्ती झाली. शाह हे १५ मे २०२३ रोजी निवृत्त होणार आहेत.