भारताचे सरन्यायाधीश (CJI) एन.व्ही. रमणा (N. V. Ramana) यांच्या अध्यक्षतेखालील सर्वोच्च न्यायालयाच्या खंडपीठाने सोमवारी डिजिटल सुनावणीदरम्यान अनेक वकिलांकडून मोबाईल फोनचा वापर केल्याचं निरीक्षण नोंदवले. सुनावणी दरम्यान, वारंवार होणाऱ्या मोबाईच्या वापरावर नाराजी व्यक्त केली. यावेळी न्यायालयाने सांगितलं की, यामुळे सुनावणी दरम्यान मोबाईलचा वापर करणाऱ्यांवर बंदी घालावी लागेल.

सरन्यायाधीश एन.व्ही. रमणा, न्यायमूर्ति ए.एस बोपन्ना आणि न्यायमूर्ति हिमा कोहली यांच्या पीठाने या गोष्टीवर नाराजी व्यक्त केली होती. ऑनलाईन सुनावणी दरम्यान, व्हिडिओ आणि ऑडिओमध्ये आलेल्या अडचणींमुळे १० प्रकरणांची सुनावणी स्थगित करावी लागली. एका प्रकरणावर सुनावणी करत असताना पीठाने सांगितलं की, वकील मोबाईल वापरताना दिसत आहेत, ज्यामुळे ते दिसत नाहीत. आम्हाला मोबाईलच्या वापरावर निर्बंध घालावे लागू शकतात. पुढे सर्व वकीलांना उद्देशून न्यायालयाने प्रश्न उपस्थित केला की, तुम्ही सर्व सर्वोच्च न्यायालयात वकीली करत आहात आणि नेहमी सुनावणीसाठी उपस्थित राहत आहात. कंप्यूटर वापरू शकत नाही का?