शोपियान जिल्ह्यातील चौधरी गुंड येथे 15 ऑक्टोबर रोजी काश्मिरी पंडित पूरण कृष्ण भट यांची दहशतवाद्यांनी हत्या केली. त्यानंतर काश्मीरच्या राजकीय पक्षांनी आणि ऑल पार्टी हुर्रियत कॉन्फरन्सने या घटनेचा निषेध केला होता. मात्र या घटनेनंतर काश्मिरी पंडित समाजात भीतीच वातावरण पसरल आहे. यामुळेच सर्व काश्मिरी पंडित कुटुंबे चौधरी गुंड गावातून जम्मूमध्ये स्थलांतरित झाली आहेत. पोलिसांच्या म्हणण्यानुसार, हे लोक अनेकदा हिवाळ्यात जम्मूला जातात.

श्रीनगरपासून 55 किमी अंतरावर असलेल्या शोपियान जिल्ह्यातील चौधरी गुंड गावात शांतता होती. दहशतवादाच्या काळात येथे राहायला आलेली सर्व काश्मिरी पंडित कुटुंबे आज जम्मूला रवाना झाली असून त्यांच्या घरांना कुलूप लावलेली दिसत आहेत. मिळालेल्या माहितीनुसार, गावात एकूण नऊ काश्मिरी पंडित कुटुंबे राहत होती. पूरण कृष्णा भट यांच्या हत्येनंतर त्यांचे कुटुंबीय जम्मूमध्ये स्थलांतरित झाले होते. पण आता राहिलेली आठ कुटुंबेही येथून निघून गेली. त्यांच्या म्हणण्यानुसार, काहींनी आपली शेती आणि बागकामाची कामेही अपूर्ण ठेवली आहेत.

एका काश्मिरी पंडिताने नाव न सांगण्याच्या अटीवर सांगितले की, जम्मूला पोहोचलेल्या कुटुंबीयांचे म्हणणे आहे की, आमच्या समुदायातील नागरिकाच्या हत्येनंतर लोक घाबरले आहेत. ते सांगतात की ते सध्या जम्मूला आले आहेत, ते जमीनदार लोक आहेत. त्यांच्याकडे शेती आणि बागायतीशिवाय कोणताही व्यवसाय नाही. शेवटी, कधी ना कधी आपल्याला परत यावेच लागेल. तूर्तास, आम्ही हिवाळ्यात जम्मूमध्ये राहू आणि नंतर परिस्थिती कशी होते ते पाहू. खोऱ्यातील वातावरण अनुकूल असल्याचे जाणवले, तर परत जाता येईल.