नवी दिल्ली- आपल्या अल्पवयीन मुलीवर मित्राला लैंगिक अत्याचार करु देणाऱ्या महिलेला जामीन देण्यास तेलंगना हायकोर्टाने नकार दिला आहे. महिलेने लिव्ह-इन-पार्टनरला आपल्या अल्पवयीन मुलीवर लैंगिक अत्याचार करु दिल्याचा आरोप आहे. याप्रकरणी हायकोर्टाने सुनावणी करत महिलेची जामीनाची मागणी फेटाळून लावली आहे. न्यायमूर्ती जी. श्री देवी यांच्या पीठाने महिलेला जामीन देण्याप्रकरणी सुनावणी केली. महिलेविरोधात आयपीसी कलम 376(2)(f),376(3),341 आणि 50 अंतर्गत गुन्हा दाखल करण्यात आला आहे.

कोर्टाने याप्रकरणी सर्व कागदपत्रांची पडताळणी केली. यावेळी कोर्ट म्हणाले की, महिलेविरोधातील आरोप गंभीर स्वरुपाचे आहेत. त्यामुळे आरोपीला जामीन दिला जाऊ शकत नाही. महिलेच्या पतीचा मृत्यू झाला होता. त्यानंतर आरोपी महिला आपल्या अल्पवयीन मुलीसह एका पुरुषासोबत लिव्ह-इन राहत होती. यादरम्यान महिलेने संबंधित पुरुषाला आपल्या मुलीवर लैंगिक अत्याचार करु दिला. परिणामस्वरुप, वारंवार लैंगिक अत्याचार झाल्याने मुलगी गरोदर झाली आणि तिने एका मुलाला जन्म दिला.

एका बाळाला जन्म दिल्यानंतर सुद्धा पीडित मुलीवर अनेकदा बलात्कार होत राहिला. त्यात ती पुन्हा दोनवेळा गरोदर झाली. त्यावेळी तिने गोळ्या घेऊन गर्भपात केला. डीएनए रिपोर्टमध्येही व्यक्ती पीडित मुलीच्या बाळाचा बाप असल्याचं स्पष्ट होतंय. कोर्टाने ही बाब निदर्शनास आणली. याप्रकरणी पोलिसांनी चार्जशिट दाखल केली आहे. आरोपातील गांभीर्य लक्षात घेता, ते अत्यंत गंभीर आणि भयानक आहे. त्यामुळे आम्ही याप्रकरणात याचिकाकर्त्याला जामीन देऊ शकत नाही. याप्रकरणी न्यायमूर्तींनी संबंधित कोर्टाला खटला सुरु करुन सहा महिन्यांच्या आत निकाल लावण्यास सांगितलं आहे.