नवी दिल्ली : जम्मू पोलिसांनी दहशतवादी (Terrorist) तालिब हुसैन शाह याला अटक केली आहे. अटक केलेला दहशतवादी एकेकाळी जम्मूमधील भाजपच्या अल्पसंख्याक आघाडीचा सोशल मीडिया प्रभारी होता. रविवारी (ता. ३) सकाळी तालिब हुसेन शाह आणि साथीदारांना रियासी परिसरात ग्रामस्थांनी पकडून पोलिसांच्या ताब्यात दिले. दहशतवाद्यांकडून पोलिसांना दोन एके ४७ रायफल, ग्रेनेड, इतर अनेक शस्त्रे आणि मोठ्या प्रमाणात गोळ्या जप्त केल्या. (Terrorist arrested in Jammu)

ऑनलाइन सदस्यत्व घेण्याचा एकच तोटा आहे की तुम्ही कोणाचीही पार्श्वभूमी न तपासता पक्षाचे सदस्यत्व देता. या दहशतवाद्याच्या (Terrorist) अटकेनंतर हा मोठा मुद्दा समोर आला आहे. मी म्हणेन की हे एक नवीन मॉडेल आहे. ज्याच्याअंतर्गत कोणीही पक्षात प्रवेश करतो आणि रेकी करतो, असे भाजपचे प्रवक्ते आरएस पठानिया म्हणाले.

अशाप्रकारे पक्षाच्या सर्वोच्च नेतृत्वाला मारण्याचा दहशतवादी कट रचतात. मात्र, कोणतीही मोठी घटना घडण्यापूर्वीच पोलिसांनी त्यांना अटक (arrested) केली. ही दिलासादायक बाब आहे. सीमेवर अनेक लोक दहशत पसरवण्याचा प्रयत्न करीत आहेत, असेही भाजपचे प्रवक्ते आरएस पठानिया म्हणाले.

यावर्षी ९ मे रोजी भाजपने अटक केलेला दहशतवादी शाह याला जम्मू क्षेत्राचे आयटी आणि सोशल मीडिया प्रमुख बनवले होते. ‘श्री तालिब हुसैन शाह हे दराज कोटरंका, बुधान, जि. राजौरी येथील भाजप अल्पसंख्याक आघाडी जम्मू प्रांताचे नवीन आयटी आणि सोशल मीडिया प्रभारी असतील’ असे त्यावेळी भाजप (BJP) अल्पसंख्याक आघाडी जम्मू आणि काश्मीरने जारी केलेल्या आदेशात म्हटले होते.

यानंतर दहशतवादी तालिब हुसैन शाहचे भाजपच्या वरिष्ठ नेत्यांसोबतचे अनेक फोटोही समोर आले होते. जम्मू-काश्मीर भाजप अध्यक्ष रवींद्र रैना यांच्यासोबत तालिब हुसैन शाह यांचेही अनेक फोटो आहेत. जम्मू-काश्मीरचे राज्यपाल आणि पोलिस प्रमुखांनी दहशतवाद्यांना पकडून पोलिसांच्या ताब्यात देणाऱ्यांना बक्षीस जाहीर केले आहे.