नवी दिल्ली- देशातील काही राज्यात कोरोना रुग्णांची संख्या झपाट्याने वाढत आहे. या पार्श्वभूमीवर देशाची राजधानी दिल्ली अलर्ट झाली आहे. देशातील पाच राज्यातील नागरिकांना दिल्लीत यायचं असल्यास त्यांना कोरोनाची चाचणी करुन घेणं आणि रिपोर्ट निगेटिव्ह येणं अनिवार्य असणार आहे. महाराष्ट्र, केरळ, छत्तीसगड, मध्य प्रदेश आणि पंजाब राज्यातून दिल्ली येणाऱ्या नागरिकांनी निगेटिव्ह RT-PCR दाखवल्यावर दिल्लीमध्ये एंट्री मिळणार आहे. वृत्तसंस्था एएनआयने यासंदर्भातील वृत्त दिलं आहे. 

सुप्रीम कोर्टाचा मोठा निर्णय; हिंदू महिला माहेरच्या नातेवाईकांना देऊ शकते...

देशात कोरोनाबाधित रुग्णांची संख्या वाढत आहे. विशेष म्हणजे देशातील एकूण कोरोनाबाधित रुग्णांपैकी जवळपास 70 टक्के रुग्ण या पाच राज्यातून आहेत. त्यामुळे दिल्ली सरकारने याबाबत निर्णय घेतला आहे. महाराष्ट्र, केरळ, छत्तीसगड, मध्य प्रदेश आणि पंजाब राज्यातून दिल्ली जाणाऱ्या लोकांना अगोदर कोरोना चाचणी करुन घ्यावी लागणार आहे. या राज्यातून आलेल्या लोकांची 72 तासांच्या आत केलेल्या कोरोना चाचणीचा रिपोर्ट पाहूनच त्यांना दिल्लीत प्रवेश दिला जाणार आहे. 

दिल्ली सरकारने जारी केलेला हा आदेश 26 फेब्रुवारीच्या रात्रीपासून 15 मार्चच्या दुपारी 12 पर्यंत लागू असणार आहे. महत्त्वाचं म्हणजे विमान, ट्रेन आणि बसने दिल्लीत येणाऱ्या प्रवाशांसाठी हा नियम असणार आहे. दिल्लीत कारने येणाऱ्या प्रवाशांना यातून सूट असणार आहेत. गेल्या काही दिवसांपासून देशातील अनेक राज्यात कोरोनाचे रुग्ण वाढत आहेत. विशेष करुन महाराष्ट्रात कोरोना रुग्णांची संख्या झपाट्याने वाढत आहे. अमरावती आणि यवतमाळ जिल्ह्यात लॉकडाऊन लागू करण्यात आला आहे.