पणजी - सिओलिम गावात दोन वेगवेगळ्या घटनांमध्ये दोन रशियन महिलांचा मृत्यू झाला आहे. गेल्या 24 तासात या घटना उघडकीस आल्या असून यामध्ये महिला ज्या भाड्याच्या घरांमध्ये राहत होत्या तिथं मृतावस्थेत आढळल्या आहेत.

याबाबत मिळालेली माहिती अशी की, 24 वर्षीय अॅलेक्झांड्रा जावी गुरुवारी त्यांच्या घरी पंख्याला गळफास घेतलेल्या अवस्थेत सापडल्या. तर 34 वर्षांच्या एकाटेरिना टिटोवा त्यांच्या अपार्टमेंटमध्ये मृतावस्थेत सापडल्या.

गोवा पोलिसांनी दिलेल्या माहितीनुसार, टिटोवाच्या मृतदेहावर कोणत्याही जखमांचे व्रण नव्हते. दोन्ही प्रकरणात अनैसर्गिक मृत्यूची नोंद करण्यात आली असून याचा अधिक तपास सुरु आहे.

गेल्या दशकभरात गोव्यात रशियन पर्यटकांची संख्या वाढली आहे. सिओलिममधील मोरजिम आणि अरमाबोल ही गावं समुद्र किनाऱ्याजवळ असून रशियन पर्यटकांमध्ये ही लोकप्रिय ठिकाणे आहेत.