साध्वी सरस्वती (Sadhvi Saraswati) यांनी नुकतंच एक वादग्रस्त विधान केलंय. सरस्वती यांनी जनतेला गायी (Cow) आणि कुटुंबाच्या रक्षणासाठी घरात तलवारी ठेवण्याचं आवाहन केलंय. त्या विश्व हिंदू परिषदेच्या (Vishwa Hindu Parishad) नेत्या असल्याचं बोललं जातंय. विहिंपनं आयोजित केलेल्या एका कार्यक्रमात साध्वी सरस्वती म्हणाल्या, फोनवर लाखो खर्च करण्याऐवजी लोकांनी गायींच्या सुरक्षेसाठी तलवारी (Sword) आणि शस्त्रे खरेदी केली पाहिजेत.

साध्वी पुढे म्हणाल्या, जर लोक लाखो रुपयांचा मोबाईल खरेदी करू शकत असतील, तर ते आपल्या गायींच्या रक्षणासाठी नक्कीच शस्त्रे खरेदी करू शकतात आणि घरीही ठेवू शकतात. यामुळं लोक त्यांच्या 'दैवी मातेचं' गोहत्येपासून संरक्षण करतील, असं त्यांचं म्हणण आहे.

उडुपी जिल्ह्यात एका सभेला संबोधित करताना साध्वी यांनी वरील वादग्रस्त विधान केलंय. साध्वी म्हणाल्या, माझा जन्म गोठ्यात झाला असून गोहत्या थांबवणं हे माझं परम कर्तव्य आहे. ज्या दिवशी माझा जन्म झाला, तेव्हापासून माझ्याकडं दोन संकल्प होते. एक म्हणजे, भगवान रामाचं (Lord Rama) मंदिर बांधण्याचं आणि दुसरं भारतात गोहत्या बंद करण्याचं, असं त्यांनी सांगितलं.