विद्यापीठ अनुदान आयोगाने (UGC) देशभरातील विविध खाजगी आणि सरकारी विद्यापीठांना पत्र लिहून 2022-2023 या शैक्षणिक वर्षातील पदवीचे प्रवेश सेंट्रल युनिव्हर्सिटी एन्ट्रन्स टेस्टचे गुणांवरून द्यावेत अशा सुचना दिल्या आहेत. सर्व विद्यापीठांना लिहिलेल्या पत्रात, UGC ने अनेक परीक्षांना बसणाऱ्या विद्यार्थ्यांना होणारा त्रास टाळण्यासाठी आगामी काळातील शैक्षणिक वर्षासाठी CUET प्रक्रियेचा अवलंब करण्याच्या सुचना दिल्या आहेत.

विद्यापीठ अनुदान आयोगाने सर्व विद्यापीठांच्या कुलगुरु, संचालक आणि प्राचार्यांना या सुचना देण्यात आल्या असून, त्यांना प्रवेशाची पद्धत निवडण्यास सांगितलं आहे. प्रवेशासाठी एकतर बारावीच्या गुणांचा किंवा प्रवेश परीक्षा घेण्याचा पर्याय शैक्षणिक संस्थासमोर ठेवला आहे. विविध प्रवेश परीक्षांमध्ये येणारे अडथळे आणि वेगवेगळ्या स्पर्धांसाठी विद्यार्थ्यांना करावा लागणारा संघर्ष याबद्ददल चिंता दर्शवत व्यक्त करत, आयोगाने शैक्षणिक संस्थांना प्रवेशासाठी CUET 2022 चे गुण विचारात घेण्याचे आवाहन केले आहे.

वेगवेगळ्या प्रवेश परीक्षा या वेगवेगळ्या तारखांना होतात, काही वेळा त्या सोबतच येतात, काही वेळा विद्यार्थी वेगवेगळ्या दोन परीक्षांमध्ये पात्र होतात. तसंच वेगवेगळ्या बोर्डातून आलेल्या विद्यार्थ्यांना समान संधी देण्यासाठी युजीसीने हा पुढाकार घेतला असून, त्यासाठी सर्व शैक्षणिक संस्थांना आवाहन करण्यात आलं आहे.