नवी दिल्ली : १८ व्या लोकसभेचं आजपासून पहिलं अर्थसंकल्पीय अधिवेशन सुरु होत असून उद्या अर्थसंकल्प सादर होणार आहे. हा अर्थसंकल्प कसा असेल? याची माहिती पंतप्रधान नरेंद्र मोदी यांनी आज पत्रकारांसमोर बोलताना दिली. यावेळी त्यांनी उद्या सादर होणारा अर्थसंकल्प हा अमृतकाळातील अर्थसंकल्प असल्याचं म्हटलं आहे.

मोदी म्हणाले, "आजपासून देशाच्या बजेट आणि पावसाळी अधिवेशनालाही सुरुवात होत आहे. देशाचं या अधिवेशनावर बारीक असणार आहे. कारण हे अधिवेशन सकारात्मक, सृजनात्मक व्हावं तसंच देशवासियांच्या स्वप्नांना सिद्ध करण्यासाठी एक मजबूत पाया घालणारं असावं असं जनतेला वाटतं आहे"

"मी देशवासियांना ज्या गॅरंटी दिल्या आहेत, त्यांना प्रत्यक्षात आणण्याचं लक्ष्य घेऊन आम्ही पुढे जात आहोत. हे बजेट अमृतकाळातील एक महत्वपूर्ण बजेट आहे. आम्हाला पाच वर्षांसाठी जी संधी मिळाली आहे, आजचं बजेट आमच्या पुढील पाच वर्षांची दिशाही निश्चित करेल. तसेच सन २०४७ अर्थात जेव्हा भारतीय स्वातंत्र्याची शंभर वर्षे पूर्ण होतील तेव्हाच आपलं 'विकसित भारता'चं जे स्वप्न आहे, हे स्वप्न पूर्ण करण्याचा मजबूत पाया रचणारं बजेट घेऊन आम्ही उद्या देशासमोर घेऊन येत आहोत"

प्रत्येक देशवासियासाठी ही गर्वाची बाब आहे की, भारत सर्वात मोठ्या अर्थव्यवस्थांच्या देशांपैकी सर्वाधिक वेगानं पुढे जाणारा देश आहे. गेल्या तीन वर्षात सातत्यानं ८ टक्के वाढीसह आपण पुढे जात आहोत. आज भारताची सकारात्मक दृष्टी, गुंतवणूक आणि कार्यक्षमता एक प्रकारे संधीच्या शिखरावर आहे. हा भारताच्या विकास यात्रेचा एक महत्वाचा भाग आहे," असंही मोदी यावेळी म्हणाले.