लखनऊ- उत्तर प्रदेशातून एक मोठी बातमी हाती येत आहे. बहुजन समाज पक्षाच्या 9 आमदारांनी बंडखोरी केली आहे. सर्व बंडखोर आमदार समाजवादी पार्टीचे अध्यक्ष अखिलेश यादव यांची भेट घेणार असल्याची माहिती आहे. उत्तर प्रदेशात विधानसभेच्या निवडणुका जवळ आल्या आहेत. या पार्श्वभूमीवर राजकीय घडामोडींना वेग आल्याचं दिसत आहे. बसपाचे 9 बंडखोर आमदार अखिलेश यादव यांची भेट घेणार आहेत. त्यामुळे राजकीय वर्तुळात उलटसुलट चर्चांना सुरुवात झाली आहे. (utter Pradesh bsp mayawati 9 mla rebels will join sp akhilesh yadav)

पुढीलवर्षी मार्च महिन्यात उत्तर प्रदेशातील विधानसभा निवडणुका संभावित आहेत. मागच्या विधानसभेवेळी बसपा आणि सपाने एकत्र निवडणूक लढवली होती. पण, आता दोन्ही पक्षांमध्ये वाद निर्माण झाला आहे. दोन्ही पक्षांच्या युतीला निवडणुकीत यश मिळालं नाही. तेव्हापासून अनेक आमदारांमध्ये अस्वस्थता होती. आता निवडणुकीला 8-9 महिने राहिले असताना बसपाच्या आमदारांनी बंडखोरी केली आहे. बंडखोर आमदार समाजवादी पार्टीमध्ये प्रवेश करण्याची शक्यता आहे.

निवडणुकीच्या पार्श्वभूमीर उत्तर प्रदेशात अनेक घडामोडी पाहायला मिळणार आहे. काही दिवसांपूर्वी जितीन प्रसाद यांनी काँग्रेसला सोडचिठ्ठी देत भाजपमध्ये प्रवेश केला होता. आता बसपा आमदारांच्या बंडखोरीने राजकीय वातावरण तापत असल्याचं स्पष्ट दिसत आहे. बहुजन समाज पक्षाच्या प्रमुख मायावती यांच्यासाठी हा मोठा धक्का मानला जातोय. दरम्यान, येत्या काळात उत्तर प्रदेशातील राजकारणात मोठी उलथापालथ पाहायला मिळण्याची शक्यता आहे.