आयकर विभागाच्या (Income tax department) पथकानं आज (शनिवार) सकाळी माजी मुख्यमंत्री अखिलेश यादव (Akhilesh Yadav) आणि सपा नेत्यांच्या लखनऊ (Lucknow), मैनपुरी (Mainpuri), मऊ येथील घरं आणि कॅम्प ऑफिसवर छापे टाकले. मैनपुरीचे मनोज यादव, लखनौमधील माजी मुख्यमंत्र्यांचे ओएसडी जैनेंद्र यादव आणि मऊचे राजीव राय यांच्यासह डझनहून अधिक नेत्यांचा यात समावेश आहे. आंबेडकर पार्कजवळील (Ambedkar Park) जैनेंद्र यादव (Jainendra Yadav) यांच्या घरावर लखनऊमध्ये आयकरनं छापा टाकलाय. तर दुसरीकडं मऊ येथील सपा नेते राजीव राय यांच्या कॅम्प ऑफिसवर छापा टाकण्यात आलाय. या छाप्याची माहिती मिळताच, कार्यकर्ते घटनास्थळी दाखल झाले असून त्यांनी गोंधळ घालयला सुरुवात केलीय. दरम्यान, गदारोळ वाढण्याच्या भीतीनं मोठा पोलीस (UP Police) बंदोबस्त घटनास्थळी मागवण्यात आलाय.

मऊमध्ये (Mau) आयकर पथकानं आज सकाळी कोतवाली शहरातील सहादतपुरात असलेल्या एसपीचे (Samajwadi Party) राष्ट्रीय सचिव राजीव राय (Rajiv Rai) यांच्या कॅम्प ऑफिसवर छापा टाकला. यादरम्यान वाराणसीच्या आयकर विभागानं राजीव राय यांना त्यांच्या घरात रोखलं. राय यांच्या घराबाहेर मोठ्या प्रमाणात फौजफाटा तैनात करण्यात आलाय. खरं तर सपा सरकारच्या काळात वीज महामंडळाच्या भूमिगत केबल टाकण्याच्या कामात राजीव राय यांच्यावर भ्रष्टाचाराचे गंभीर आरोप आहेत.

मनोज यादव यांच्या घरावर छापा

दरम्यान, आयकर विभागानं शनिवारी पहाटे पंजाबी कॉलनी, मैनपुरी येथे राहणारे राज्य कंत्राटदार मनोज यादव (Manoj Yadav) यांच्या घरावर छापा टाकला. 12 वाहनांच्या ताफ्यासह दाखल झालेल्या आयकर विभागाच्या पथकानं संपूर्ण घराला आतून कुलूप लावलंय. घराबाहेर स्थानिक पोलिसांचा पहारा आहे. कोणालाही आत प्रवेश दिला जात नाहीय. सकाळी 6 वाजल्यापासून आयकर विभागाचे पथक घरामध्ये तपास करत आहे. छापेमारीमागच्या कारणाबाबत अद्याप कोणतीही माहिती देण्यात आलेली नाही.

माजी मुख्यमंत्र्यांचे OSD यादव यांच्या घरावरही छापा

लखनऊमध्ये आंबेडकर पार्कजवळ असलेले माजी मुख्यमंत्र्यांचे ओएसडी जैनेंद्र यादव यांच्या घरावर आयकर विभागानं छापा टाकलाय. तासनतास घराची झडती घेतलीय. शिवाय, आयकरनं अनेक कागदपत्रं आपल्या सोबत घेतली आहेत. यावेळी घरासमोर मोठा पोलिस बंदोबस्त तैनात करण्यात आला होता.