उत्तराखंडमधील ऋषिकेश-बद्रीनाथ राष्ट्रीय महामार्गावर भीषण अपघात झाला आहे. या अपघातात 14 जणांचा मृत्यू झाला आहे. ही दुर्दैवी घटना राष्ट्रीय महामार्गावरील रतौली गावाजवळ घडली. काल(शनिवारी) सकाळी अकराच्या सुमारास एक टेम्पो ट्रॅव्हलर खड्ड्यात पडून त्यात प्रवास करणारे लोक गंभीर जखमी झाले.

या अपघातात 14 जणांचा मृत्यू

अपघातानंतर काही वेळात बचाव पथके घटनास्थळी पोहोचली. तोपर्यंत घटनास्थळीच 10 जणांचा मृत्यू झाला होता आणि त्यानंतर आणखी दोन पर्यटकांचा मृत्यू झाला होता. तर ऋषिकेश एम्समध्ये उपचारादरम्यान दोघांचा मृत्यू झाला. बसमधून प्रवास करणारे पर्यटक चोपटा येथे दर्शनासाठी जात असताना यावेळी बस १५० मीटर खोल दरीत कोसळली.

ड्रायव्हरला लागली झोप

या घटनेला चालक जबाबदार असल्याचे बोलले जात आहे. ड्रायव्हरला अचानक झोप लागली आणि यादरम्यान बस दरीत कोसळल्याचे सांगण्यात येत आहे. बस दरीत पडली तेव्हा सर्व पर्यटक झोपले होते. या प्रवाशामध्ये सुमारे २३ जणांचा समावेश होता. हे सर्वजण चोपटा-तुंगनाथ-चंद्रशिला ट्रेकिंगसाठी जात होते.

प्रवासी 250 मीटर खोल दरीत कोसळले

बस कोसळेलेली दरी सुमारे 250 मीटर खोल आहे आणि ती अलकनंदा नदीच्या काठावर आहे. या अपघातात आतापर्यंत 14 जणांचा मृत्यू झाला आहे. या अपघातानंतर पंतप्रधान नरेंद्र मोदी यांनी याबद्दल दु:ख व्यक्त केले असून स्थानिक प्रशासनाला आवश्क त्या सूचना देण्यात आल्या आहेत.

राज्य सरकारही भीषण अपघाताची दखल घेतली आहे. मुख्यमंत्री पुष्कर सिंह धामी यांनी या दुर्घटनेवर शोक व्यक्त केला असून जिल्हाधिकाऱ्यांना घटनेची चौकशी करण्याचे आदेश दिले आहेत. घटनेची माहिती मिळताच एसडीआरएचची टीम तात्काळ घटनास्थळी पोहोचली आणि मदतकार्य सुरू करण्यात आले.

गृहमंत्री अमित शाह यांनीही या भीषण अपघातानंतर शोक व्यक्त केला आहे. त्यांनी सोशल मिडीया X वर लिहिले, “उत्तराखंडच्या रुद्रप्रयागमध्ये झालेल्या अपघाताची दुःखद बातमी मिळाली. या दुर्घटनेत ज्यांनी प्राण गमावले त्यांच्या कुटुंबियांसोबत माझ्या संवेदना आहेत. स्थानिक प्रशासन आणि एसडीआरएफचे पथक मदत आणि बचाव कार्यात गुंतले असून जखमींना शक्य ती सर्व मदत केली जात आहे. जखमी लवकरात लवकर बरे व्हावेत यासाठी मी देवाकडे प्रार्थना करतो.”