नवी दिल्ली : आरोग्य मंत्रालयाचे सचिव लव अग्रवाल यांनी म्हटलंय की, सध्या भारतातील कोरोनाच्या आकडेवारीमध्ये सातत्यपूर्ण अशी घट दिसून येत आहे. देशातील सध्याचा रिकव्हरी रेट हा 96.9 टक्क्यांवर पोहोचला आहे. जगभरात सर्वाधिक लसीकरण पार पडलेल्या देशांमध्ये भारत आघाडीवर आहे. अमेरिकेलाही मागे टाकत भारतात 163 दिवसांमध्ये 32 कोटी नागरिकांचं लसीकरण पार पडलं आहे. अमेरिकेला हा टप्पा गाठायला 193 दिवस लागले आहेत.

कोव्हॅक्सिन, कोविशील्ड, स्पुटनिक-व्ही आणि मॉडर्ना या चारही लशी स्तनापान करणाऱ्या मातांसाठी सुरक्षित आहेत. लशीचा आणि वंध्यत्वाची समस्या येण्याचा काही एक संबंध नाहीये, असंही नीती आयोगाचे सदस्य (आरोग्य) डॉ. व्ही. के पॉल यांनी स्पष्ट केलंय. गर्भवती मातांच्या लशीकरणासंदर्भातील ऍडवायझरी लवकरच जाहिर केली जाईल. गर्भवती मातांसाठी लस सुरक्षित आहे तसेच आरोग्य मंत्रालय यासंदर्भात अधिक अभ्यास करत आहे, असंही ते म्हणाले.

पुढे त्यांनी म्हटलंय की, आंतरराष्ट्रीय स्तरावर विकसित झालेली पहिली लस मॉडर्नाला आपत्कालीन वापारासाठी परवानगी देण्यात आली आहे. मात्र, ही परवानगी मर्यादीत वापरासाठी आहे. सध्या कोव्हॅक्सिन, कोविशील्ड, स्पुटनिक व्ही आणि मॉडर्ना या चार लशी उपलब्ध आहेत. फायझरसोबत देखील आम्ही लवकरच चर्चा संपवू. आतापर्यंत भारतात डेल्टा प्लस व्हेरियंटचे एकूण 51 रुग्ण नोंदवले गेले आहेत.