सध्या देशात एका बाजुला महागाईचा भडका उडाला आहे. त्यातच दुसरीकडे हनुमान चालिसा, ज्ञानवापी मशिद, मथुरा, औरंगजेब कबर याशिवाय जात-धर्माच्या मुद्यांवरून राजकीय वातावरण तापलं आहे. सध्याच्या या परिस्थितीत आशुतोष राणा यांचा एक व्हिडिओ सोशल मीडियावर व्हायरल होत आहे. चार वर्षांपूर्वीचा हा व्हिडिओ असून तत्कालीन परिस्थितीबाबत त्यांना प्रश्न विचारण्यात आले होते. देशातील वातावरणाबाबत त्यांनी तेव्हा व्यक्त केलेलं मत आजही लागू होत असल्याचं नेटकऱ्यांनी म्हटलं आहे.

दरम्यान, या व्हिडिओत एका खासगी वृत्तसंस्थने त्यांची मुलाखत घेतली आहे. सध्या देशाची हवा कशी आहे? असा प्रश्न केला असता ते म्हणाले, काही निर्णयांमुळे राग येतो कधी कधी रागांमुळेही बदल घडत असतो. एक अभिनेता म्हणून तुम्ही याकडे कसे पाहता यावर राणा म्हणाले की, कोणताही कलाकार नऊ रसांचे जीवन जगतो असतो. त्यापैकी एकही रस निघून गेला तर जगण्यात मजा नाही, असं त्यांनी स्पष्ट केलं होतं.

यावेळी राणा यांनी एका हिंदी कवितेच्या काही ओळीतून भाष्य केलं होतं. जमीनीचे तुकडे केलेत, चंद्र ताऱ्यांचं काय? नद्यांना नावं दिलीत पण वाहणाऱ्या पाण्याचं काय? भगवान शंकराची गंगासुद्धा पाणीच आहे. मुल्ला, पंडित हेसुद्धा पाणी पितात त्याचा धर्म काय असेल? या सर्वांना विचारा की सूर्य वेगळा बनवणार का असे अनेक प्रश्न त्यांनी हिंदी कवितेतून व्यक्त केले होते.