नवी दिल्ली - दिल्लीसह (Delhi) आसपासच्या परिसरात आज अचानक पाऊस (Rain) झाला. यामुळे वातावरणातही मोठ्या प्रमाणात बदल झाल्याचं दिसून आलं. दिल्लीत मंगळवारी दिवसा कडक ऊन होतं. तर रात्रीच्या सुमारास वेगवान वाऱ्यासह पावसाने झोडपलं. यामुळे वातावरणात गारवा निर्माण झाला आहे. हवामान विभागाने दिल्लीसह परिसरात मध्यम पावसाची शक्यता वर्तवली होती.

हवामान विभागाने रात्री पावसाचा इशारा दिला होता. दिल्लीतील नरेला, बवाना आणि हरयाणातील सोनीपत, गुरुग्राममध्ये पाऊस पडेल अशी शक्यता वर्तवली होती. याशिवाय उत्तर प्रदेश आणि राजस्थानातील काही भागात पाऊस पडेल असंही सांगण्यात आलं होतं.

दिल्लीत यलो अलर्ट जारी करण्यात आला होता. आता पावसामुळे उत्तर प्रदेशातील काही भागात थंडी वाढण्याची शक्यता आहे. बुधवारी रात्री काश्मीर, हिमाचल प्रदेश आणि उत्तराखंडमध्ये वीजांसह पाऊस आणि बर्फवृष्टी होईल असा अंदाज हवामान विभागाने व्यक्त केला आहे.