नवी दिल्ली : इंडिया गेटवर नेताजी सुभाषचंद्र बोस यांचा पुतळा बसवणार असल्याची घोषणा पंतप्रधान नरेंद्र मोदी (PM Modi) यांनी केली. त्यावरूनच पश्चिम बंगालच्या मुख्यमंत्री ममता बॅनर्जी (West Bengal CM Mamata Banerjee) यांनी मोदींवर निशाणा साधला आहे. पुतळा बसवण्याचा निर्णय फक्त आमच्या दबावामुळे घेतल्याचं ममता म्हणाल्या. नेताजींच्या १२५ व्या (Netaji Subhashchandra Bose 125th Birth Anniversary) जयंतीनिमित्त आयोजित केलेल्या कार्यक्रमात त्या बोलत होत्या.

तुम्हाला पश्चिम बंगालची अॅलर्जी का आहे? आधी २६ जानेवारीच्या आमच्या चित्ररथाला परवानगी नाकारली. आता नेताजींचा पुतळा बसवण्याचा निर्णय फक्त आमच्या दबावामुळे घेण्यात आला. पण, पुतळा बसवला म्हणून जबाबदारी संपत नाही, असं ममता म्हणाल्या.

आजपर्यंत तुम्हाला नेताजींचा ठावठिकाणी माहिती नाही. आम्ही सत्तेवर आल्यावर ते काम करू असं केंद्र सरकारने सांगितलं होतं. पण, प्रत्यक्षात तसं काहीही घडलं नाही. खरंतर पश्चिम बंगाल सरकारने सुभाषचंद्र बोस यांच्यावरील सर्व फायली उघड केल्या आहेत, असंही ममता म्हणाल्या. बंगाल नसता तर देशाला स्वातंत्र्य मिळाले नसते. मला बंगाली असण्याचा अभिमान वाटतो, असंही ममता म्हणाल्या.

अमर जवान ज्योतीचं विलनीकरण करण्यात आलं. त्यावरून विरोधकांनी मोदी सरकारवर प्रचंड टीका केली. त्यानंतर मोदींनी इंडिया गेटवर नेताजी सुभाषचंद्र बोस यांचा पुतळा बसवण्याची घोषणा केली. तसेच पुतळा तयार होतपर्यंत होलोग्राम पुतळा याचठिकाणी असेल. या पुतळ्यामुळे देशातील तरुणांना प्रेरणा मिळेल, असं मोदी म्हणाले होते.