कोलकाता - पश्चिम बंगालची राजधानी कोलकात्यातील बडा बाजार भागातील इमारतील भीषण आग लागली आहे. स्ट्रँड रोडवरील इमारतीच्या बाराव्या मजल्यावर लागेल्या या आगीत 7 जणांचा होरपळून मृत्यू झाल्याची माहिती समोर येत आहे. पोलिसांनी माहिती देताना सांगितलं की, आग विझवण्यासाठी अग्निशमन दलाच्या 8 गाड्या घटनास्थळी दाखल झाल्या आहेत. 

आगीची घटना घडताच परिसरात गोंधळ निर्माण झाला होता. आजुबाजुच्या इमारती रिकाम्या करण्यात आल्या असून लोकांना घटनास्थळाकडे येण्यास मज्जाव करण्यात आला आहे.

फायर अँड इमर्जन्सी सर्विसेसचे अधिकारी सुजित बोस यांनी सांगितलं की, आतापर्यंत सात जणांचा मृत्यू झाल्याची माहिती मिळाली आहे. बचावकार्य सुरु असून रात्री उशिरा मुख्यमंत्री ममता बॅनर्जी घटनास्थळी दाखल झाल्या आहेत. त्यांनी बचावकार्य वेगानं करण्याचे आदेश दिले आहेत. 

हे वाचा - भाजपसाठी पाच राज्यांची निवडणूक आव्हानात्मक; ओपिनियन पोलचा अंदाज

कोलकाता पोलिसांनी दिलेल्या माहितीनुसार सोमवारी सायंकाळी सहाच्या सुमारास ही घटना घडली. इमारतीतून आगीचे लोट दिसताच पोलिसांना माहिती देण्यात आली. यानंतर घटनास्थळी 8 अग्निशमन दलाच्या गाड्या दाखल झाल्या. या इमारतीमध्ये रेल्वेचं कार्यालयसुद्धा आहे. आगीवर नियंत्रण मिळवण्याचा प्रयत्न केला जात आहे. इमारत रिकामी करण्यात आली असल्याची माहिती देण्यात आली आहे.