पश्चिम बंगालमध्ये झालेल्या हिंसाचार घटनेत एक खळबळजनक बाब समोर आली आहे. बीरभूम जिल्ह्यातील बोगतुई (Bogtui) गावात जिवंत जाळलेल्या तीन महिला आणि दोन मुलांसह आठ जणांना हत्याकांडाच्या आधी त्यांना बेदम मारहाण करण्यात आली होती, त्यांच्या फॉरेन्सिक तपासणी तसेच शवविच्छेदन अहवालात ही बाब उघड झाले आहे.

फॉरेन्सिक तज्ज्ञांच्या प्राथमिक निष्कर्षांनुसार, पीडितांना प्रथम बेदम मारहाण करण्यात आली आणि नंतर त्यांना जिवंत जाळण्यात आले, असे रामपूरहाट रुग्णालयातील एका अधिकाऱ्याने पीटीआय या वृत्तसंस्थेला सांगितले. फॉरेन्सिक तज्ञांनी मंगळवारी पहाटे अज्ञात लोकांनी कथितरित्या जाळलेल्या लोकांच्या मृतदेहांची तपासणी केली होती.

या घटनेप्रकरणी आतापर्यंत 20 जणांना अटक करण्यात आली आहे. मंगळवारी पहाटे रामपूरहाटच्या बोगतुई गावात डझनभर घरे जाळण्यात आल्याने दोन मुलांसह एकूण आठ जणांचा मृत्यू झाला. सोमवारी तृणमूल काँग्रेसचे (टीएमसी) पंचायत स्तरावरील नेते भादू शेख यांच्या कथित हत्येच्या काही तासांतच ही घटना घडली.

पश्चिम बंगालच्या मुख्यमंत्री ममता बॅनर्जी (Mamata Banerjee) यांनी आज बीरभूम जिल्ह्यातील बोगतुई गावाला भेट दिली. यावेळी ममता म्हणाल्या की, बहाणे चालणार नाही, जे या घटनेसाठी जबाबदार आहेत, त्यांना तात्काळ ताब्यात घ्या. बंगालमध्ये हे असं होऊ शकतं असं मला कधीच वाटलं नव्हतं. एका आई आणि मुलाचा या घटनेत मृत्यू झाला. हे मोठं षडयंत्र असल्याचा आरोप करत बॅनर्जी यांनी कठोर कारवाईची घोषणा केली आहे. तसंच हत्येमागील कारणांचा पोलीस सर्व बाजूंनी तपास करणार असल्याचंही त्यांनी सांगितलं.