Wrestlers Protest: कुस्ती महासंघाचे अध्यक्ष ब्रिजभूषण शरण सिंह यांच्यावर लैंगिक शोषणाप्रकरणी अटकेची मागणी करत खेळाडूंनी दिल्लीच्या जंतर-मंतर मैदानावर ठाण मांडलं आहे. पण आता हे आंदोलन चिघळलं आहे.

काल रात्री दिल्ली पोलिसांनी आंदोलक महिला खेळाडूंसोबत गैरव्यवहार केल्याचा आरोप आंदोलकांनी केला आहे. पोलिसांच्या कारवाईमुळं खेळाडूंना अक्षरशः रडू कोसळलं.

पण या प्रकारामुळं चिडलेला आंदोलक कुस्तीपटू बजरंग पुनिया यानं जनतेला दिल्लीमध्ये ट्रॅक्टर रॅली काढण्याचं आवाहन केलं आहे. (Wrestlers Protest alleged Police mishandling Bajarang Punia called for a tractor rally)

बजरंग पुनिया रात्री माध्यमांसमोर बोलताना म्हणाला की, संपूर्ण देशाची आम्हाला गरज आहे. आज सर्वांनी दिल्ली यावं. दिल्ली पोलीस आंदोलकांवर जबरदस्ती करत आहे, आई-बहिणीवरुन शिव्या देत आहेत.

पण अद्याप यांनी ब्रिजभूषण सिंह यांच्यावर काहीही कारवाई केलेली नाही. पोलीस प्रशासानाची ही परिस्थिती आहे. आपण जितके देशवासी आहात त्यांनी ट्रॅक्टर घेऊन इथं यावं दिल्लीत पोहोचावं.

बुधवारी रात्री उशीरा दिल्ली पोलिसांची आणि आंदोलकांची बाचाबाची झाली. आंदोलकांचं म्हणणं आहे की, दिल्लीत पाऊस पडत असल्यानं त्यांनी जंतरमंतर बेड मागवले होते.

पण पोलिसांनी हे बेड आंदोलनस्थळी पोहोचण्याआधीच थांबवले. त्यामुळं आंदोलनक आणि पोलिसांमध्ये बाचाबाची झाली.

यामध्ये दुष्यंत फोगाटसह दोन कुस्तीपटू जखमी झाल्याचं सांगितलं जात आहे. या प्रकारानंतर साक्षी मलिक, विनेश फोगाट आणि संगिता फोगाट या महिला खेळाडूंना रडू आवरलं नाही.

या गोंधळात कुस्तीपटू राकेश यादव याच्या डोकं फुटलं तर विनेश फोगाटचा भाऊ दुष्यंत याच्या डोक्यालाही जखम झाली आहे. या दोघांना उपचारांसाठी रुग्णालयात दाखल करण्यात आलं आहे.