Wrestlers Protest : कुस्तीपटूंच्या आंदोलनादरम्यान ब्रिज भूषण शरण सिंह यांच्यावर भाजप हायकमांडकडून कारवाई करण्यात आली आहे. सूत्रांनी दिलेल्या माहितीनुसार, भाजपच्या केंद्रीय नेतृत्वाने ब्रिजभूषण यांना कुस्तीपटूंच्या बाबतीत अनावश्यक वक्तव्ये टाळण्याच्या सूचना दिल्या आहेत.

मिळालेल्या माहितीनुसार, भाजप हायकमांडच्या सूचनेनुसार ब्रिजभूषण यांनी ५ जून रोजी होणारी प्रस्तावित सभा देखील रद्द केली आहे. भाजपने ब्रिजभूषण यांना रॅली न घेण्यास सांगितले होते.

कुस्तीपटूंकडून लैंगिक शोषणाचे आरोप केले गेल्यानंतर भारतीय कुस्ती महासंघाचे अध्यक्ष ब्रिज भूषण शरण सिंह यांनी ५ जून रोजी अयोध्येत जनजागृती रॅली काढण्याची घोषणा केली होती . भाजप खासदार ब्रिज भूषण यांनी दावा केला की या रॅलीमध्ये ११ लाख लोक त्यांच्या समर्थनार्थ येतील असा दावा केला होता, मात्र शुक्रवारी (२ जून) त्यांनी फेसबुक पोस्टद्वारे रॅली रद्द करण्याची घोषणा केली.

ब्रिजभूषण यांनी फेसबुक पोस्टमध्ये लिहिले आहे की, माझ्या प्रिय शुभचिंतकांनो! तुमच्या पाठिंब्याने मी गेली २८ वर्षे लोकसभेचा सदस्य म्हणून काम केले आहे. मी सत्तेत असताना आणि विरोधात असताना सर्व जाती, समाज आणि धर्माच्या लोकांना एकत्र आणण्याचा प्रयत्न केला आहे. याच कारणांमुळे माझे राजकीय विरोधक आणि त्यांच्या पक्षांनी माझ्यावर खोटे आरोप केले आहेत.

त्यांनी पुढे लिहिले की, सध्याच्या परिस्थितीत काही राजकीय पक्ष ठिकठिकाणी मोर्चे काढून प्रांतवाद आणि जातीय संघर्ष वाढवून सामाजिक सलोखा बिघडवण्याचा प्रयत्न करत आहेत. संपूर्ण समाजात पसरलेल्या वाइट गोष्टींवर विचारमंथन करण्यासाठी ५ जून रोजी अयोध्येत संत संमेलन घेण्याचे ठरले होते, परंतु आता पोलीस हे आरोपांची चौकशी करत असून सर्वोच्च न्यायालयाच्या सूचनांचा आदर करत 'जन चेतना, महारॅली, ५ जून, अयोध्या चलो' कार्यक्रम काही दिवसांसाठी पुढे ढकलण्यात आला आहे.

पोस्टच्या शेवटी ब्रिज भूषण यांनी त्यांच्या समर्थकांचे आभार व्यक्त करत त्यांचे कुटुंब नेहमीच ऋणी राहील, असे म्हटले आहे. ब्रिज भूषण यांची रॅली रद्द करण्याची घोषणा खाप पंचायती कुस्तीपटूंच्या समर्थनार्थ उतरल्या नंतर घेण्यात आला आहे. गुरुवारी मुझफ्फरनगरमधील सोराम येथे सर्वजाती खाप पंचायतीनंतर शुक्रवारी कुरुक्षेत्रमध्ये महापंचायत बोलावण्यात आली आहे.