नवी दिल्ली - उत्तर प्रदेशचे कॅबिनेट मंत्री राकेश सचान यांच्यावर शिक्षेची फाईल घेऊन कोर्टातून पळून गेल्याचा गंभीर आरोप करण्यात आला आहे. शनिवारी कानपूर न्यायालयाने सचान यांना एका प्रकरणात दोषी ठरवले होते. मात्र न्यायालय शिक्षा सुनावण्यापूर्वीच मंत्री आपल्या वकिलाच्या मदतीने दोषी ठरवण्याच्या आदेशाची मूळ प्रत घेऊन फरार झाले. (yogi cabinet minister rakesh sachan absconded from kanpur court)

एवढेच नाही तर जामीनपत्र न भरताच ते कोर्टरूममधून पळून गेले. आता न्यायालयाच्या सादरकर्त्याने मंत्र्यांविरुद्ध पोलिसांत एफआयआर नोंदवण्यासाठी तक्रार दिली आहे. 1991 मध्ये तत्कालीन समाजवादी पक्षाचे नेते राकेश सचान यांच्याकडून पोलिसांनी अवैध शस्त्र जप्त केले होते. याप्रकरणी त्याच्यावर शस्त्रास्त्र कायद्यान्वये गुन्हा दाखल करण्यात आला होता. याच प्रकरणात (७२९/१९९१) शनिवारी अतिरिक्त मुख्य महानगर दंडाधिकारी-३, कानपूर यांच्या न्यायालयात सुनावणी सुरू होती. यादरम्यान कोर्टाने सचान यांना दोषी ठरवले.

राकेश सचान यांना दोषी सिद्ध करून शिक्षा सुनावण्याची तयारी कोर्ट करत होते. यापूर्वी बचाव पक्षाला शिक्षेवर वाद सुरू करण्यास सांगितले होते. मात्र जेव्हा राकेश सचान दोषी ठरवण्याची आदेशाची फाईल घेऊनच कोर्टातून गायब झाले. यानंतर संपूर्ण न्यायालयात आणि पोलीस-प्रशासनात खळबळ उडाली.

दुसरीकडे, दुपारी राकेश सचान यांना आजारपणामुळे घेऊन गेल्याचे वकिलांच्या वतीने सांगण्यात आले. तसेच राकेश सचान यांनी गुपचूप कोर्टरूममधून बाहेर पडल्याचा आरोप फेटाळून लावला.