कुडित्रे : जिल्हा कृषी अधीक्षक पद पुन्हा प्रभारी झाले आहे. सेवानिवृत्त झालेले जिल्हा कृषी अधीक्षक फक्त पाच महिन्यांसाठी पदावर होते. जिल्ह्यातील कृषी विभागात (Agriculture Department) ३२८ पदे रिक्त असून, गावात काम करणाऱ्या कृषी सहायकांची ९८ पदे रिक्त आहेत.

यामुळे शासनाच्या योजना शेतकऱ्यांपर्यंत पोहोचत नसल्याचे चित्र आहे. जिल्ह्यात ४ लाख ४४ हजार हेक्टर शेतीचे क्षेत्र असून, ६ लाख ७५ हजार इतके शेतकरी (Farmer Scheme) आहेत. कृषी विभागात ८१७ पदे मंजूर असताना कोविड काळापासून दोन वर्षे ४८९ कर्मचाऱ्यांवर कृषी खात्याचा कारभार आहे.

गेल्या वर्षी ३०८ पदे रिक्त होती. यामधील पदे भरण्याऐवजी पुन्हा वीस पदे रिक्त झाली. जिल्हा कृषी अधीक्षक ज्ञानदेव वाकुरे गेल्यावर्षी सेवानिवृत्त झाले. त्यामुळे जिल्हा कृषी अधीक्षकपद प्रभारी होते. यानंतर दत्तात्रय दिवेकर यांनी फक्त पाच महिन्यांसाठी कार्यभार सांभाळला.

यानंतर आता पुन्हा हे पद प्रभारी झाले असून, या ठिकाणी अरुण भंगारदिवे हे प्रभारी कृषी अधीक्षक म्हणून रुजू झाले आहेत. त्यांनी राधानगरी, शाहूवाडी, कागल अशा ठिकाणी तालुका कृषी अधिकारी व विविध पदांवर काम केले आहे. त्यामुळे त्यांना कामाचा अनुभव आहे. नवीन कारभारी येईपर्यंत ते खाते सांभाळणार आहेत.

रब्बीच्या तोंडावर

तीन ते पाच गावांसाठी एक कृषी सहायक असून, पीक सल्ला घेणे किंवा खते, बी-बियाणे याबाबत सल्ला घेण्याबाबत शेतकऱ्यांत रब्बीच्या तोंडावर अडचणी निर्माण झाल्या आहेत. शासनाने रिक्त जागा भराव्यात, अशी मागणी होत आहे.

दृष्टिक्षेपात...

• जिल्ह्यात १२२९ गावे

• सहा लाख ७५ हजार खातेदार शेतकरी

• कृषी सहायक ९८ व कृषी पर्यवेक्षक ३८ पदे रिक्त

• तीन ते पाच गावांचा एका कृषी सहायकावर भार

• ५०० गावांत कृषी सहायक नसल्याचे चित्र

• राष्ट्रीय कृषी विकास योजनेत प्रस्तावच नाहीत