पुणे : राज्यातील शासकीय आणि खासगी औद्योगिक प्रशिक्षण संस्थेतील (आयटीआय) प्रवेशासाठी ३१ डिसेंबरपर्यंत मुदतवाढ दिली आहे. नवी दिल्लीतील प्रशिक्षण महासंचालनालयाने नव्याने तुकड्यांना प्रवेशाची परवानगी दिल्याने प्रवेशाची ही मुदत वाढविण्यात आली आहे. त्यानुसार रिक्त जागांवरील प्रवेशासाठी व्यवसाय शिक्षण व प्रशिक्षण संचालनालयाने प्रवेशाचे सुधारित वेळापत्रक जाहीर केले आहे.

प्रवेशासाठी दिलेल्या मुदतीत अद्याप प्रवेश अर्ज करू न शकलेल्या विद्यार्थ्यांना संधी मिळणार आहे. तर सर्व शासकीय आणि खासगी आयटीआयमध्ये केंद्रीय प्रवेश प्रक्रियेद्वारे रिक्त जागांवरील प्रवेशासाठी संस्थास्तरीय समुपदेशन फेरीद्वारे प्रवेश मिळतील. संस्थास्तरीय समुपदेशन प्रवेश फेरीसाठी उपलब्ध जागांचा तपशील प्रवेशाच्या संकेतस्थळावर उपलब्ध आहे.

आयटीआय प्रवेशाचे सुधारित वेळापत्रक : तपशील : कालावधी

• नव्याने ऑनलाइन प्रवेश अर्ज करणे, प्रवेश अर्ज निश्चित करणे : १५ डिसेंबरपर्यंत

• सर्व उमेदवारांच्या समुपदेशन फेरीसाठी एकत्रित गुणवत्ता यादी प्रसिद्ध करणे, विद्यार्थ्यांना एसएमएसद्वारे कळविणे : १६ डिसेंबर (दुपारी ३ वाजता)- संस्थास्तरीय समुपदेशन फेरीतंर्गत प्रवेशोच्छुक व नोंदणीकृत विद्यार्थ्यांनी संबंधित संस्थेत (सकाळी ८ ते ११ वाजेपर्यंत) व्यक्तीश: उपस्थित राहणे, फेरीसाठी हजेरी नोंदविलेल्या विद्यार्थ्यांमधून त्याचदिवशी गुणवत्ता यादी तयार करून प्रकाशित करणे, निवड झालेल्या विद्यार्थ्यांच्या मूळ कागदपत्रांची पडताळणी करून प्रवेश निश्चित करणे : ३१ डिसेंबर

• खासगी आयटीआय स्तरावरील प्रवेशासाठी संबंधित संस्थेतील जागांवर प्रवेश निश्चित करणे : ३१ डिसेंबर

विद्यार्थी व पालकांसाठी सूचना

• सर्व शासकीय आणि खासगी आयटीआयसाठी ऑनलाइन अर्ज करणे आवश्यक

• कोणत्याही परिस्थितीत ऑनलाइन प्रवेश प्रक्रियेव्यतीरिक्त प्रवेश घेणाऱ्या विद्यार्थ्यांचे प्रवेश ग्राह्य धरणार नाही

• प्रवेश पद्धती, नियमावली, प्रवेश संकेतस्थळ याबाबत शंका असल्यास जवळच्या आयटीआयशी संपर्क साधावा

‘आटीआय’ प्रवेशाच्या माहितीसाठी संकेतस्थळ : https://admission.dvet.gov.in आणि www.dvet.gov.in