औरंगाबाद: आयटीआय प्रवेश प्रक्रियेअंतर्गत १५ जुलैपासन नोंदणी सुरू झाली आहे. राज्यात यंदा शासकीय संस्थांमध्ये ९३ हजार ८१६ तर खासगी संस्थांत ५५ हजार ४८० अशा एकूण सुमारे १ लाख ४९ हजार २१६ जागा उपलब्ध आहेत. बुधवारपर्यंत (ता.चार) सुमारे एक लाख १७ हजार ३०६ विद्यार्थ्यांनी प्रवेशासाठी ऑनलाइन अर्ज (नोंदणी) केले आहेत. त्यात मराठवाड्यातून तब्बल ३१ हजार विद्यार्थ्यांचा समावेश आहे.

दहावी निकालाचा परिणाम-
दहावीच्या निकालानतंर आयटीआयची प्रवेशप्रक्रियेला गती मिळाली आहे. त्यामुळे आपल्या आवडत्या ट्रेड आणि आयटीआयसाठी विकल्प अर्ज भरण्याच्या प्रक्रियेला विद्यार्थ्यांकडून मोठा प्रतिसाद मिळत आहे. कोरोनामुळे दहावीची परीक्षा न झाल्यामुळे मूल्यांकन पद्धतीने जाहीर केलेल्या निकालात सर्वच विद्यार्थी उत्तीर्ण झाले आहेत. त्यात मराठवाड्यातून सुमारे तीन लाख विद्याथी चांगल्या गुणांनी उत्तीर्ण झाले आहेत.

त्यामुळे अकरावी प्रवेशासाठी शिक्षण विभागाने विद्यार्थ्यांना सीईटीची अट घातली आहे; परंतु आयटीआयच्या प्रवेशाला अकरावीप्रमाणे सीईटीसारखी अट नसल्याने विद्यार्थ्यांची मोठ्या प्रमाणात आयटीआय प्रवेशाला पसंती मिळत आहे. मागील वर्षाच्या तुलनेत यंदा आयटीआय प्रवेशासाठी सर्वाधिक अर्ज येतील, अशी शक्यता शासकीय आयटीआयचे प्रा. अभिजित अल्टे यांनी व्यक्त केली. दरम्यान, विद्यार्थ्यांना नोंदणीसाठी आणखी सुमारे दीड महिन्याचा कालावधी असून त्यानंतर विविध फेऱ्या होऊन प्रवेश निश्चित होतील.

मराठवाड्यातील स्थिती-
यंदा मराठवाड्यातील ८२ शासकीय आयटीआयमध्ये १४ हजार, तर ५७ खासगी आयटीआयमध्ये पाच हजार ६०८ अशा एकूण २० हजार २६४ जागा प्रवेशासाठी उपलब्ध आहेत. मागील आठवडाभरात ३० हजार ९८७ विद्यार्थ्यांनी प्रवेशासाठी ऑनलाइन नोंदणी केली आहे. आयटीआयमध्ये जिल्ह्यातील स्थानिक ९० टक्के विद्यार्थ्यांना प्रवेश दिला जाणार असून परजिल्ह्यातील दहा टक्के विद्यार्थ्यांसाठी जागा राखीव असणार आहेत.