पुणे : महाराष्ट्र राज्य परीक्षा परिषदेमार्फत इयत्ता आठवीसाठी घेतलेल्या राष्ट्रीय आर्थिक दुर्बल घटक विद्यार्थ्यांसाठी शिष्यवृत्ती योजना परीक्षा (एनएमएमएस) १९ जून २०२१ रोजी  घेण्यात आलेली होती. या परीक्षेची अंतिम उत्तरसूची परिषदेच्या ‘www.mscepune.in/’ आणि ‘https://nmmsmsce.in/’ या संकेतस्थळावर उपलब्ध करून देण्यात आली आहे, अशी माहिती परीक्षा परिषदेच्या आयुक्त शैलजा दराडे यांनी दिली आहे.

‘एनएमएमएस’ या परीक्षेच्या मॅट आणि सॅट पेपरच्या प्रश्नपत्रिकेतील कोणत्याही प्रश्नाबाबत किंवा पर्यायी उत्तराबाबत त्रुटी किंवा आक्षेप असल्यास ते परीक्षा परिषदेकडे ४ जुलैपर्यंत पाठविण्याबाबत कळविण्यात आले होते. दिलेल्या मुदतीत प्राप्त झालेल्या ऑनलाइन निवेदनांवर विषय तज्ज्ञांचे अभिप्राय घेऊन अंतिम उत्तरसूची प्रसिद्ध करण्यात आली आहे. या अंतिम उत्तरसूचीबाबत कोणतेही निवेदन आणि आक्षेप स्वीकारले जाणार नाहीत. तसेच या परीक्षेसाठी गुणपडताळणी केली जात नाही, याची मुख्याध्यापक, पालक, विद्यार्थी यांनी नोंद घ्यावी. या अंतिम उत्तरसूचीनंतर एनएमएमएस या शिष्यवृत्ती परीक्षेचा निकाल लवकरच परिषदेच्या संकेतस्थळावर प्रसिद्ध करण्यात येईल, असे दराडे यांनी सांगितले.