पुणे : ‘‘कोरोनाच्या प्रादुर्भावानंतर ‘ई कॉमर्स’ आणि ‘लॉजस्टिक’ क्षेत्रांचा उद्योगातील वाटा वाढत आहे. या क्षेत्रात करियरच्या अनेक संधी उपलब्ध होत आहेत,’’ असे मत नॅशनल स्कील डेव्हलपमेंट कॉर्पोरेशनचे (एनएसडीसी) डॉ. गणेशन यांनी व्यक्त केले.

बृहन महाराष्ट्र वाणिज्य महाविद्यालयाच्यावतीने (बीएमसीसी) बारावीची परीक्षा उत्तीर्ण होणाऱ्या विद्यार्थ्यांसाठी आयोजित केलेल्या ‘ई -कॉमर्स क्षेत्रातील संधी’ विषयावर ते होते. सावित्रीबाई फुले पुणे विद्यापीठाचे कुलगुरू डॉ. नितीन करमळकर, दलित इंडस्ट्री आणि चेंबर ऑफ कॉमर्सचे संस्थापक मिलिंद कांबळे, एनएसडीसीचे रमेश व्यंकट, बीएमसीसीच्या प्राचार्या डॉ. सीमा पुरोहित आदी उपस्थित होते.

डॉ. गणेशन म्हणाले, ‘‘बीएमसीसीत एनएसडीसीच्या सहकार्याने सुरू केलेला बॅचलर ऑफ मॅनेजमेंट स्टडीज (बीएमएस) हा अभ्यासक्रम ई-कॉमर्स क्षेत्रातील करियरसाठी उपयुक्त आहे. या क्षेत्रातील अभ्यासक्रमासह एका वर्षाच्या नामांकित कंपनीतील अप्रेंटिसमुळे प्रात्यक्षिकांचा अनुभव विद्यार्थ्यांना मिळणार आहे.’’

डॉ. करमळकर म्हणाले, ‘‘कौशल्यावर आधारित अभ्यासक्रम महत्त्वाचे असून, त्यामुळे रोजगाराच्या मोठ्या संधी उपलब्ध होतात.’’ व्यंकट म्हणाले, ‘‘ई -कॉमर्स क्षेत्र वेगाने विकसित होत असून त्यात करिअर करण्यासाठी दृष्टिकोन, कौशल्य आणि या क्षेत्रातील ज्ञानाची सांगड घालणे आवश्यक आहे.’’