सोलापूर : अणुऊर्जा विभागात सरकारी नोकरी (Jobs) शोधणाऱ्या उमेदवारांनो, तुमच्यासाठी आता नोकरीची मोठी संधी चालून आली आहे. आयआरईएल इंडिया लिमिटेड (IREL India Limited) या भारत सरकारच्या अणुऊर्जा विभागाअंतर्गत (Department of Atomic Energy) सार्वजनिक क्षेत्रातील कंपनीने देशभरातील त्यांच्या प्रकल्प / युनिट / कार्यालयाकरिता 54 पदांच्या भरतीसाठी जाहिरात प्रसिद्ध केली आहे. कंपनीने जारी केलेल्या जाहिरातीनुसार पदवीधर प्रशिक्षणार्थी (वित्त), पदवीधर प्रशिक्षणार्थी (एचआर), डिप्लोमा प्रशिक्षणार्थी (तांत्रिक), कनिष्ठ पर्यवेक्षक (राजभाषा), पर्सनल सेक्रेटरी आणि ट्रेड्‌समन ट्रेनी या पदांसाठी पात्र उमेदवारांकडून अर्ज मागवण्यात आले आहेत.

असा करा अर्ज

इच्छुक उमेदवारांनी IREL (इंडिया) लिमिटेडच्या irel.co.in या अधिकृत वेबसाइटला भेट द्यावी. नंतर करिअर सेक्‍शनमध्ये जावे. करिअर पेजवर जाहिरात क्र. (CO/HRM/07/2021) ही भरतीची जाहिरात डाउनलोड करण्यासाठी आणि ऑनलाइन अर्ज करण्यासाठी दिलेल्या लिंकवर क्‍लिक केल्यास उमेदवार अर्ज पेजवर जाऊ शकतात, जिथे त्यांना नवीन नोंदणीवर क्‍लिक करून प्रथम नोंदणी करावी लागेल आणि नंतर त्यांचा ई-मेल आयडी आणि पासवर्ड वापरून लॉगइन करून अर्ज सबमिट करावा लागेल. आयआरईएलमधील या पदांसाठी अर्ज प्रक्रिया 15 सप्टेंबरपासून सुरू झाली आहे आणि शेवटची तारीख 5 ऑक्‍टोबर 2021 आहे.

उमेदवारांना ऑनलाइन अर्ज करताना 400 रुपये शुल्क भरावे लागेल, जे ऑनलाइन पद्धतीने (डेबिट कार्ड, क्रेडिट कार्ड, नेट बॅंकिंग) भरता येईल. तथापि एससी, एसटी, ईएसएम, दिव्यांग आणि महिला उमेदवारांसाठी फीमध्ये सूट दिली आहे. पात्रता निकष, निवड प्रक्रिया आणि विविध पदांसाठी व इतर माहितीसाठी उमेदवार भरती जाहिरातीच्या लिंकला भेट देऊ शकतात.