तुम्ही जर नोकरीच्या शोधात असाल, तर तुमच्यासाठी एक खुशखबर आहे. एकत्रित संयुक्त उच्च माध्यमिक स्तर परीक्षेतून (CHSL) होणाऱ्या भरतीमधील पदांची संख्या वाढवण्यात आली आहे. कर्मचारी निवड आयोगाने याबाबत माहिती दिली. यापूर्वी या परीक्षेतून १६०० पदांवर भरती घेण्यात येणार होती.

यामध्ये लोअर डिव्हिजन क्लार्क, ज्युनिअर सेक्रेटेरिअल असिस्टंट, ज्युनिअर पर्सनल असिस्टंट, डेटा एंट्री ऑफिसर अशा पदांचा समावेश आहे. या सर्व पदांवर केंद्र सरकारच्या मंत्रालय आणि इतर विभागांमध्ये थेट भरती होणार आहे. २३ मे रोजी कर्मचारी आयोगाने याबाबत नोटीस जारी केल्याचे वृत्त जागरणने प्रसिद्ध केले आहे.

'या' तारखेपर्यंत करा अप्लाय

एसएससी सीएचएसएल (SSC CHSL Application) परीक्षेसाठी अर्ज प्रक्रिया सुरू झाली आहे. ९ मेपासून ही प्रक्रिया सुरू करण्यात आली होती. अर्ज दाखल करण्याची शेवटची तारीख ८ जून २०२३ आहे. तसंच, फी भरण्याची अंतिम मुदत १० जून आहे.

कसं करता येईल अप्लाय

अर्ज करण्यासाठी इच्छुक उमेदवारांना कर्मचारी निवड आयोगाच्या वेबसाईटवर (ssc.nic.in) जावं लागणार आहे. याठिकाणी गेल्यानंतर लॉग-इन सेक्शनमध्ये जाऊन आधी तुम्हाला अकाउंट तयार करावं लागेल. त्यानंतर लॉग-इन करून आपला अर्ज दाखल करावा लागेल.

कोण करू शकतं अप्लाय

कोणत्याही मान्यताप्राप्त बोर्डातून १०+२, म्हणजेच बारावीची परीक्षा उत्तीर्ण झालेले विद्यार्थी याठिकाणी अर्ज करू शकतात. जे उमेदवार १२वीची परीक्षा देणार आहेत तेदेखील अर्ज करू शकतात. यासोबतच अर्ज करणाऱ्या उमेदवाराचे वय ऑगस्ट २०२३ पर्यंत १८ वर्षांपेक्षा जास्त आणि २७ वर्षांपेक्षा कमी असायला हवं. वयाच्या अटीमधील शिथिलतेबाबत अधिक माहिती तुम्हाला अधिकृत संकेतस्थळावर मिळेल.