Batata Puri Recipe: बटाटा हा सगळ्यांच्या आवडीचा पदार्थ आहे. बटाटा वातूळ असला तरी त्यात शरीरासाठी पोषक असे अनेक गुणधर्म असतात. उपवासाच्या पदार्थांमध्ये तर बटाटा आवर्जून वापरला जातो. त्यात कालच एकादशीच्या उपवास झाला आता परत गुरुवारचा उपवास म्हणजे साबुदाण्याची खिचडी नको वाटत असेल ना? 

गुरुवारच्या उपवासानिमित्त ट्राय करा बटाट्याच्या पुऱ्या.

साहित्य :-

• २ मोठे उकडलेले बटाटे 

• १/२ कप साबुदाणा

• ५ मिरच्या

• १/४ कप चिरलेली कोथिंबीर

• १/२ टिस्पून जिरे

• ३ टेस्पून शेंगदाणा कूट

• १ टिस्पून जिरेपूड

• २ टेस्पून शिंगाडा पिठ

• चवीपुरते मीठ

• तळण्यासाठी तेल.

कृती :-

• १/२ कप साबुदाणा पाण्यात भिजवावा. अधिकचे पाणी काढून टाकावे. नंतर किंचीत पाणी घाला. साबुदाण्याच्यावर १/२ सेमी येईल इतपत पाण्याची पातळी ठेवावी. साधारण ३-४ तास अशाप्रकारे भिजवून ठेवावे. भांडे वरून झाकावे. 

• मिक्सरमध्ये हिरव्या मिरच्या, कोथिंबीर, जिरे आणि थोडे मीठ घालून बारीक करा. पाणी घालू नका, शिजवलेले बटाटे किसून घ्या. त्यात मिरची-कोथिंबीरीचा ठेचा, शेंगदाणा कूट, भिजवलेले साबुदाणे, जिरेपूड आणि शिंगाडा पिठ घालून निट मळून गोळा बनवा.  

• तेल तापत ठेवा. प्लास्टिकवर तेलाचा हात लावून प्रत्येक गोळा त्यावर जाडसर थापा आणि तेलात टाका. पुरी तेलात टाकल्यावर झार्‍याने अजिबात पलटू नये अशाने ती तुटते. त्यावेळी झार्‍याने अलगद तेलात बुडवावी. छान ब्राऊन रंग आल्यावर काढून घ्या. गरमागरम चटणीबरोबर सर्व्ह करा.