Tandalachi Kheer Recipe : सोमप्रदोषाला अनेकांचा उपवास असतो, प्रदोष हा महादेवांनी आपल्यावर कृपा ठेवावी म्हणून अनेक लोक करतात; त्यात जर सोमप्रदोष असेल तर त्या दिवशी महादेवांना अनेक लोक मंदिरात जातात, त्यांना दुधाचा अभिषेक करतात, उपवास करतात. अशात तुम्हीही त्यांना तांदळाची खीरीचा नैवेद्य दाखवून त्यांचा आशीर्वाद घेऊ शकतात.

शिवाय घरीही काहीतरी गोड बनवलं जाऊ शकत. तांदळाची खीर बनवायला खूप सोपी आणि घरात प्रत्येकाला आवडेल अशीच असते आणि अगदीच काही मिनिटात तयारही होते. बघुया तांदळाच्या खिरीची रेसिपी

साहित्य:

- १ लिटर घट्ट सायीचे दूध (फुल्ल क्रीम दूध / म्हशीचे)

- अर्धी वाटी = १२५ ग्रॅम्स बारीक दाण्याचा तांदूळ (आंबेमोहोर, किंवा इंद्रायणी किंवा बासमती तुकडा)

- पाऊण कप = १८० ग्रॅम्स साखर (अधिक गोड आवडत असल्यास साखर थोडी वाढवली तरी चालेल)

- ५-६ मनुका

- ५-६ काजूचे तुकडे

- ५-६ चारोळी

- अर्धा टीस्पून वेलची पावडर

- पाव टीस्पून जायफळ

- तूप

कृती:

१. तांदूळ पाण्याने स्वच्छ धुऊन एका चाळणीत किमान ३० मिनिटे निथळत ठेवा. नंतर पाणी निघून गेले की मिक्सरमधून फिरवून त्याची जाडसर पावडर करून घ्यावी. खलबत्त्यात किंवा पाट्यावर रवाळ वाटले तर उत्तमच!

२. एका पातील्यात १ लिटर दूध तापवत ठेवा. दुधाला उकळी आली की आच मंद करा आणि एकदा तळापासून दूध ढवळून घ्या.

३. एका मोठ्या जाड बुडाच्या कढईत दोन चमचे तूप टाकून त्यात वाटलेले तांदूळ घालून छान परतवून घ्या. आता त्यात हे दूध घाला आणि नीट ढवळा म्हणजे तांदळाच्या गुठळ्या पडणार नाहीत. मंद आचेवर तांदूळ दुधात शिजवून घ्यावे. मधून मधून दूध ढवळत राहा आणि कढईच्या कडांना लागलेली साय दुधात घाला म्हणजे खीर चांगली दाट होते .

४. खीर शिजतेय तोवर बाजूला एका छोट्या पॅनमध्ये १-२ टेबलस्पून तूप गरम करा. त्यात चारोळ्या, काजू आणि मनुका एकामागोमाग एक परतून घ्याव्या. चारोळ्या आणि काजू खरपूस होई पर्यंत आणि मनुका फुलेपर्यंत परतवा.

५. साधारण १०-१२ मिनिटांत खीर चांगली दाट होते, आता त्यात साखर घालून ढवळून घ्या. साखर घातल्यावर थोडे पाणी सुटते. ते आटवायला अजून अजून ७-८ मिनिटे खीर मंद आचेवर शिजवून घेऊ .

६. आता सरतेशेवटी तुपात परतलेला सुका मेवा, वेलची पावडर आणि जायफळ पावडर घालून नीट ढवळून घ्या. खीर तयार आहे. गॅस बंद करून झाकून ठेवा.

७. हलकी गरम किंवा कोमट खीर तुम्ही पुऱ्यांसोबत सर्व्ह करू शकतात.