सध्या राज्यभरात जोरदार पाऊस सुरू आहे. अशात नाश्त्याला काहीतही गरम गरम खावंस वाटतं. यात पावसाची झड चालू की मग हमखास शेंगोळ्यांची आठवण येऊ लागते. शेंगोळयांच नुसतं नाव जरी काढलं तरी तोंडाला पाणी सुटते. चला तर मग बघूया आता शेंगोळे कसे तयार करायचे?

शेंगोळे तयार करण्यासाठी लागणारे साहित्य :

1) तीन वाट्या कुळथाचे पीठ

2) पाव वाटी गव्हाचे पीठ

3) पाव वाटी शेंगदाण्याचे कूट

4) लसुन पेस्ट

5) तिखट दोन चमचे

6) हळद व हिंग अर्धा चमचा

7) चार वाट्या पाणी

8) चार चमचे तेल

9) चवीनुसार मीठ

कृती :

सर्वप्रथम परातीत कुळीथ व गव्हाचे पीठ, लसूण पेस्ट, एक चमचा तेल, हळद, हिंग, चवीनुसार तिखट व मीठ टाकून थोडेसेच कोमट पाणी घालून पिठ घट्ट मळून घ्यावे. नंतर हाताला तेल लावून मळलेल्या गोळ्यातून छोटासा गोळा घेऊन साधारण बोटाएवढ्या लांबीचे शेंगोळे तयार करुन घ्यावे.

नंतर कढई मध्यम आचेवर ठेवून त्यात तेल घालावे. तेल कडक तापल्यावर मोहरी, हिंग, हळद व चमचाभर तिखट घालून फोडणी दयावी. नंतर त्यात शेंगदाण्याचे कूट घालून चांगले परतून घ्यावे. दोन-तीन मिनिटाने मग त्या फोडणीत कोमट पाणी ओतावे व पाण्याच्या अंदाजाने मीठ घालून एक खरपूस उकळी आणावी.

उकळी फुटू लागली की वळून ठेवलेले शेंगोळे हलक्या हाताने उकळीच्या पाण्यात सोडावेत. साधारण दहा ते बारा मिनिटात शेंगोळे चांगले शिजतात. शेंगोळे शिजले की नाही याचा प्राथमिक अंदाज घेण्यासाठी बोटाने ते दाबून पाहावे. नंतर मग तुम्हाला आवडत असेल तर त्यात दोन चमचे तूप घालून ढवळून झाकण ठेवावे. आचेवरून काढून कोथिंबीर घालून गरम गरम वाढावे.