तांबवे : समाजातील सलोखा कायम राहावा, एकमेकांबद्दल आपुलकी निर्माण होऊन गावागावांतील एकी कायम राहावी, या हेतूने येथील संगम गणेश मंडळाने (Ganesh Mandal) राबविलेला उपक्रम जिल्ह्यालाच नव्हे, तर राज्यासमोर आदर्शवत आहे. त्यातून जातीय सलोखा कायम राहण्यास मदत होईल, असे प्रतिपादन पोलिस उपअधीक्षक अमोल ठाकूर यांनी केले.

येथील संगम गणेश मंडळाच्या वतीने मुस्लीम बांधवांच्या वतीने (Muslim Community) श्री गणेशाची आरती करण्यात आली. त्यानंतर ते बोलत होते. सरपंच शोभाताई शिंदे, माजी जिल्हा परिषद सदस्य प्रदीप पाटील, उपसरपंच अॅड. विजयसिंह पाटील, विजयाताई पाटील, प्राची देवकर, अथर्व ताटे. डॉ. एम. एन. संदे, शंकर पाटील आदींसह ग्रामस्थ, कार्यकर्ते उपस्थित होते.

ठाकूर म्हणाले, ‘‘पुसेसावळी (Pusesawali Riots) तांबवे गावापासून खूप दूर नाही. ती घटना व्हायरल झाली. अनेक अफवा उठवल्या. मात्र, पोलिसांनी त्या घटनेचे पडसाद कोठेही उमटू दिले नाहीत. येथे मुस्लीम समाजाच्या वतीने श्री गणेशाच्या आरतीचे नियोजन केले जाते, ही खूप मोठी गोष्ट आहे. ती जिल्ह्यासाठीच नव्हे, तर राज्यासाठी आदर्शवत आहे.’’ श्री. पाटील, डॉ. संदे यांनी मंडळाच्या उपक्रमाबद्दल कौतुक केले. अॅड. पाटील यांनी सूत्रसंचालन केले. हेमंत पवार यांनी आभार मानले.

राष्ट्रीय खेळाडूंचा सन्मान

किरपे येथील राष्ट्रीय खेळाडू प्राची देवकर आणि तांबवेतील अथर्व ताटे यांचा पोलिस उपअधीक्षक ठाकूर यांच्या हस्ते सत्कार केला. यावेळी दोन्ही खेळाडूंनी गावचे नाव राज्यपातळीवर पोचवल्याबद्दल त्यांचा गौरव करण्यात आला.