बीजिंग/टोकिओ - चीनमध्ये कोरोना विषाणू संसर्गाचे थैमान सुरूच असून, बुधवारी चोवीस तासांत सुमारे २५४ नागरिकांचा मृत्यू झाला. त्यामुळे चीनमधील मृतांची संख्या १३०० वर पोचली आहे. दरम्यान, बार्सिलोना येथे होणारी मोबाईल वर्ल्ड कॉंग्रेस कोरोनाच्या उद्रेकामुळे रद्द करण्यात आली आहे. ही परिषद २४ ते २७ फेब्रुवारी रोजी आयोजित केली होती.
कोरोनाचा सर्वाधिक फटका बसलेल्या हुबेई प्रांतात काल एकाच दिवशी २४२ जणांचा मृत्यू झाला. तसेच, १५ हजार नवीन रुग्ण आढळून आले आहेत. स्थानिक आरोग्य आयोगाच्या माहितीनुसार, हुबेई प्रांतात कोरोनाचे १४,८४० नवीन रुग्ण निष्पन्न झाले आहेत. आत्तापर्यंत ४८ हजार २०६ जणांना कोरोनाची बाधा झाली असून, त्याचा वेगाने होणारा प्रसार पाहता ती संख्या ६० हजारपर्यंत पोचू शकते, असे आरोग्य विभागाने म्हटले आहे.
चीनमध्ये बुधवारपर्यंत कोरोना संसर्गामुळे एकूण मृत्युमुखी पडणाऱ्यांची संख्या १११५ वर पोचली होती. जागतिक आरोग्य संघटनेची विशेष टीम दोन दिवसांपूर्वी चीनमध्ये पोचली आहे. चीनबाहेर कोरोनाग्रस्तांची संख्या वाढत असून, ती ४४० वर पोचली आहे. त्यात एकाचा फिलिपिन्स येथे मृत्यू झाला आहे. याशिवाय जपानमध्ये सर्वाधिक रुग्ण दोनशेहून अधिक आढळून आले आहेत.
‘डायमंड प्रिन्सेस’ला बाधा
जपानच्या समुद्रात असलेल्या डायमंड प्रिन्सेस जहाजावरील कोरोनाबाधित रुग्णांची संख्या वाढत चालली आहे. गेल्या चोवीस तासांत नव्याने ४४ रुग्ण आढळले असून, ही संख्या २१८ वर पोचली. जहाजावरील कर्मचारी नोकरी गमावण्याच्या भीतीपोटी बोलावयास तयार नाहीत. मात्र, दोन भारतीय कर्मचाऱ्यांनी आपले मौनव्रत सोडले आणि व्हिडिओच्या माध्यमातून जहाजातील विदारक सत्य मांडले. त्यांनी म्हटले की, दिवसेंदिवस जहाजावर गंभीर स्थिती होत असल्याचे २४ वर्षीय जहाजावरील सुरक्षा अधिकारी सोनाली ठक्कर हिने सांगितले. आमच्या सर्वांच्या चाचण्या झाल्या असून, ज्याची चाचणी पॉझिटिव्ह आली आहे, त्यांना बाजूला ठेवले आहे. जहाजावरील कर्मचारी डोअर टू डोअर जेवण पुरवण्याचे काम करीत आहेत. त्यामुळे काहींना बाधा होण्याची भीती वाटत आहे. दरम्यान, जपानचे आरोग्यमंत्री कत्सुनोबू कातो यांनी आज ४४ नवीन रुग्ण आढळून आल्याची माहिती दिली. यात डायमंड प्रिन्सेस जहाजावरील रुग्णांचा समावेश आहे, असे जपान सरकारने सांगितले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.