देशातील आणि जगातील अनेक कंपन्यांनी ४ दिवसाच्या आठवड्याचा प्रस्ताव कर्मचाऱ्यांसमोर मांडला असून यासाठी कर्मचारी सहमत असल्याचं रिपोर्टमध्ये सांगितलं आहे. कामाचा तणाव कमी करण्यासाठी भारतातील जास्तीत जास्त कर्मचारी यासाठी सहमत आहेत असं एका रिपोर्टमध्ये सांगण्यात आलं आहे.

HR Solutions Genius Consultants च्या रिपोर्टनुसार ६० टक्के कर्मचारी यासाठी सहमत आहेत आणि कामातील समाधान, काम आणि वैयक्तिक जीवनातील समतोल, आणि कामातून होणाऱ्या तणावाला कमी करण्यासाठी ४ दिवसांच्या आठवड्याला कर्मचाऱ्यांनी पसंती दिली आहे. दरम्यान या सर्व्हेमध्ये भाग घेतलेल्या २७ टक्के कर्मचारी म्हणाले की, यामुळे कंपनीच्या कामावर आणि उत्पादनावर परिणाम होऊ शकतो. तसेच ११ टक्के कर्मचारी या प्रस्तावासाठी असहमत असल्याचं आढळून आलं. ते म्हणाले की यामुळे कोणतेही साकारात्मक बदल होण्यास मदत होणार नाही त्यामुळे आम्हाला यावर वाद घालण्याची इच्छा नाही.

दरम्यान हा सर्व्हे ऑनलाईन पद्धतीने १ मार्च ते ७ मार्चच्या दरम्यान घेण्यात आला होता. यामध्ये जवळपास १११३ कर्मचाऱ्यांनी सहभाग घेतला होता. यामध्ये बॅकिंग, अर्थ क्षेत्र, शिक्षण, अभियंता, बांधकाम, HR, IT अशा बऱ्याच क्षेत्रांतील लोकांनी सहभाग घेतला होता. त्यामधील सर्व लोकांनी ४ दिवसांच्या आठवड्याला संमती दर्शवली आहे. दरम्यान तुम्ही या सु्ट्टीच्या दिवसाची भरपाई करण्यासाठी १२ तास काम करण्यासाठी तयार आहात का? असा प्रश्न विचारल्यावर ५६ टक्के लोक यासाठी तयार झाले आणि उरलेल्या ४४ टक्के लोकांनी १२ तास काम होईल की नाही याची खात्री नसल्याचं सांगितलं.

तसंच ६० टक्के लोकं सुट्ट्यांची भरपाई करण्यासाठी १२ तासांपेक्षा अधिक वेळ काम करण्यासाठी तयार असल्याचं सांगितलं. तसंच ६६ टक्के कर्मचाऱ्यांनी ४ दिवसांच्या कामामुळे उत्पादनावर साकारात्मक परिणाम होणार असल्याचा विश्वास दाखवला आहे.

दरम्यान काही कर्मचाऱ्यांनी या मॉडेलचे स्वागत केले असून काही कर्मचाऱ्यांनी कामावर परिणाम होण्याच्या कारणावरुन यासाठी विरोध दर्शवला आहे.