काबुल - अफगाणिस्तानमध्ये तालिबानने ताबा मिळवल्यानंतर तिथली परिस्थिती भीषण अशी झाली आहे. लोकांमध्ये भीतीचं वातावरण निर्माण झालं असून नागरीक लवकरात लवकर देशातून बाहेर पडण्यासाठी धडपडत आहेत. अफगाणिस्तानमध्ये विमानतळांवर गर्दी झाली असून चेंगराचेंगरीची परिस्थिती आहे. यात आता एक धक्कादायक असा व्हिडिओ समोर येत आहे. यामध्ये लोक विमानाला लटकून जाताना दिसतात. याचा व्हिडिओ सोशल मीडियावर व्हायरल होत आहे.

अफगाणिस्तानमधून बाहेर जाणाऱ्या सी 17 विमानाला नागरीक लटकून जाण्याचा प्रयत्न करत आहेत. यात एका विमानाला लटकून जात असलेले काही जण विमानाने उड्डाण केल्यानंतर पुढच्या काही मिनिटात खाली पडताना दिसले. याचा व्हिडिओ सोशल मीडियावर एका पत्रकाराने शेअर केला आहे. तिघांपैकी दोन जण रहिवाशी भागात पडले आहेत.

अस्वाका न्यूज एजन्सीने दिलेल्या वृत्तानुसार, काबुल एअरपोर्टजवळ स्थानिक लोकांनी असा दावा केला की, एका विमानाच्या टायर्सला पकडून तीन जण बसले होते. विमानाने उड्डाण केल्यानंतर तीन तरुण हवेतून खाली पडले. या नागरिकांचा मृत्यू झाला असल्याचं समजते.