न्यूयॉर्क : अफगाणिस्तान हा देश पुन्हा दहशतवादाचा अड्डा बनता कामा नये असा इशारा चीनने तालिबानला दिला आहे. संयुक्त राष्ट्रेच्या (यूएन) सुरक्षा परिषदेच्या सोमवारी पार पडलेल्या बैठकीत चीनचे उपप्रतिनिधी गेंग शुआंग यांनी याविषयी परखड भाष्य केले. ते म्हणाले की, अफगाणिस्तानात दहशतवाद पोसला जाता कामा नये हाच निर्णायक मुद्दा असेल. अफगाणिस्तानमध्ये भविष्यात कोणताही राजकीय तोडगा काढताना याविषयी ठाम राहावेच लागेल. तालिबान त्यांच्या आश्वासनांवर ठाम राहिली आणि त्याची कळकळीने पूर्तता करेल आणि दहशतवादी संघटनांबरोबर स्पष्टपणे फारकत घेईल अशी अपेक्षा आहे. तालिबान खुले आणि सर्वसमावेशक इस्लामी सरकार स्थापन करेल अशीही आशा आहे.

अनागोंदीचा गैरफायदा नको

अफगाणिस्तानात अनागोंदी निर्माण झाल्यामुळे त्याचा गैरफायदा उठविण्यासाठी इस्लामिक स्टेट (आयएस), अल््-कायदा आणि इटीआयएम (पूर्व तुर्किस्तान इस्लामी चळवळ) अशा संघटना प्रयत्न करतील, असे नमूद करून शुआंग यांनी सांगितले की, या संघटनांना रोखण्यासाठी खंबीर कृतीची गरज आहे. त्यासाठी सर्व देशांनी आंतरराष्ट्रीय कायदा आणि सुरक्षा परिषदेच्या ठरावांबाबत बंधनकारक असलेल्या करारांची पुर्तता करावी.

याआधी शेजारच्या चीनने तालिबानबद्दल अनुकूल भूमिका घेतली आहे. चीनने तालिबानसोबत मैत्रीपूर्ण संबंध विकसित करण्याची इच्छा व्यक्त केली आहे. "आम्ही अफगाणि जनतेच्या अधिकारांचा आदर करतो. अफगाणिस्तानसोबत मैत्रीपूर्ण आणि सहकार्याचे संबंध विकसित करण्याची आमची इच्छा आहे" असे चीनच्या परराष्ट्र मंत्रालयाचे प्रवक्त्या हुआ चुनयिंग यांनी पत्रकारांना सांगितले.