दमास्कस - सीरियाच्या उत्तर भागात अमेरिका आणि रशिया यांच्या वाहनांमध्ये झालेल्या धडकेवरून या दोन देशांमध्ये वाद निर्माण झाला आहे. या धडकेत अमेरिकेचे काही सैनिक जखमी झाले असून याबाबतचा व्हिडिओ रशियाने प्रसिद्ध केला आहे. सीरियामधील अंतर्गत यादवी संपवून शांतता प्रस्थापित करण्यासाठी अमेरिका आणि रशिया या दोन्ही देशांनी हस्तक्षेप करत आपले सैन्य येथे तैनात केले आहे. दोन्ही देशांच्या सैन्यात वाहनाच्या धडकेवरून वाद झाला. अमेरिकेच्या वाहनाने रशियाच्या गस्ती पथकातील वाहनाला अडवण्याचा प्रयत्न केला असल्याचं या व्हिडिओत दिसत आहे. तसंच यावेळी रशियाचं हेलिकॉप्टरसुद्धा याठिकाणी दाखल झाल्याचं दिसतं आहे. 

सीरियाचे अध्यक्ष बाशर अल असाद यांना रशियाचा पाठिंबा आहे तर, अमेरिकेचा स्थानिक कुर्द नेत्यांना पाठिंबा आहे. यावरून या दोन्ही देशांमध्ये अनेकदा संघर्ष निर्माण होतो आहे. रशियाने प्रसिद्ध केलेल्या व्हिडिओमध्ये सीरियाच्या वाळवंटी भागात रशियाचे एक चिलखती वाहन अमेरिकेच्या वाहनाला धडक देताना दिसत आहे. रशियाचे एक हेलिकॉप्टरही या व्हिडिओमध्ये दिसत आहे. गस्त घालत असताना अमेरिकेने अडथळा आणला असा रशियाचा दावा आहे तर, रशियाचे वाहनच बळजबरीने सुरक्षित भागात घुसले होते, असा आरोप अमेरिकेच्या लष्करी अधिकाऱ्यांनी केला आहे.

हे वाचा - "जो बायडेन यांचा विजय झाल्यास चीन अमेरिका ताब्यात घेईल"

अमेरिका आणि रशियाने येथे गस्तीसाठी भाग वाटून घेतले आहेत. या नियमाचे रशियाने पालन केले नाही, असे अमेरिकी अधिकाऱ्याचे म्हणणे आहे. सीरियामध्ये २०११ पासून अंतर्गत यादवी सुरु असून या देशाची संपूर्ण अर्थव्यवस्था खिळखिळी झाली आहे. अमेरिका आणि रशियातील संघर्ष कमी व्हावा यासाठी करण्यात आलेल्या नियमांचं उल्लंघन रशियानं केलं असा आरोप अमेरिकेनं केला होता. तसंच आम्हाला हा वाद वाढवायची इच्छा नाही. पण त्यांनी जर आक्रमक भूमिका घेतली तर त्याला जशास तसे प्रत्युत्तर द्यायला तयार आहोत असंही अमेरिकेनं म्हटलं.