टोकिओ/केपटाऊन : नोव्हेंबरच्या पहिल्या आठवड्यात आढळलेला ओमिक्रॉनचा संसर्ग पंधरा देशात पसरला आहे. आज जपानमध्ये ओमिक्रॉनबाधित पहिल्या रुग्णांची नोंद झाली आहे. नामिबियाहून मंगळवारी जपानमध्ये आलेल्या ३० वर्षाच्या एका व्यक्तीत ओमिक्रॉनचे लक्षणे आढळून आले. टोकिओच्या नारिता विमानतळावर कोरोना चाचणी केली असता त्याचा अहवाल पॉझिटिव्ह आला. यात ओमिक्रॉनचे विषाणू आढळून आले. दरम्यान, निर्बंधांमुळे नाराज असलेले मलावीचे अध्यक्ष लजारूस चकवेरा यांनी अमेरिका, ब्रिटनला ‘एफ्रोफोबिया’ झाल्याचा आरोप केला आहे.

दक्षिण आफ्रिकेत सापडलेल्या नवीन व्हेरिएंटने जगातील १५ देशांत शिरकाव केला आहे. दक्षिण आफ्रिका, बोट्स्वानासह कॅनडा, ब्रिटन, इटली, फ्रान्स, बेल्जियम, स्वित्झर्लंड, जर्मनी, डेन्मार्क, नेदरलँड, झेक रिपब्लिक, हॉंगकॉंग, ऑस्ट्रेलिया देशात ओमिक्रॉनचा रुग्ण आढळले आहेत. आता जपानमध्ये ओमिक्रॉनबाधित रुग्ण आढळून आला आहे. जपान सरकारचे प्रवक्ते हिरोकाजू मात्सुनो यांनी म्हटले की, नामिबियाहून आलेल्या प्रवाशाच्या नमुन्याचे विश्‍लेषण केल्यानंतर ओमिक्रॉनचे लक्षणे आढळली. हा पहिला रुग्ण आहे. त्याला आयसोलेशनमध्ये ठेवले आहे.

ओमिक्रॉन व्हेरिएंटवर आफ्रिकी आणि पश्‍चिम देशात आरोप-प्रत्यारोप केले जात आहेत. आफ्रिकी देश मलावीचे अध्यक्ष लजारुस चकवेरा यांनी अमेरिका, ब्रिटन आणि युरोपिय देशांवर एफ्रोफोबिया झाल्याचा आरोप केला आहे. दक्षिण आफ्रिकेवर लावण्यात आलेल्या निर्बंधांमुळे चकवेरा यांनी नाराजी व्यक्त केली आहे. त्यांच्या मते, ओमिक्रॉन व्हेरिएंटबाबत शास्त्रानुसार निर्णय घेतले जात नाहीत. फेसबुक पोस्टवर ते म्हणाले, की ओमिक्रॉन व्हेरिएंट शोधल्याबद्धल जगाने आफ्रिकी संशोधकांचे आभार मानले पाहिजे. याउलट आमच्यावरच बंदी घातली जात आहे. अमेरिका, युरोप, ब्रिटन आणि ऑस्ट्रेलियाकडून चुकीचे पावले उचलली जात आहेत. नव्या व्हेरिएंटवर नियमानुसार आणि शास्त्रानुसार निर्णय घ्यायला हवेत. यासाठी एफ्रोफोबिया पीडित होण्याची गरज नाही, अशा शब्दांत टीका केली आहे.

सिंगापूरमध्ये प्रवाशांची चाचणी होणार

सिंगापूर : ओमिक्रॉनमुळे सिंगापूरमध्ये निर्बंध लागू केले आहेत. दैनंदिन व्यवहारातील शिथिलता देखील कमी करण्यात आली आहे. सिंगापूरमध्ये प्रवेश करणाऱ्या प्रवाशांना आणखी कडक नियमांचे पालन करावे लागणार आहे. हे नवीन नियम लवकरच लागू होतील. तसेच १२ नोव्हेंबर ते २७ नोव्हेंबर दरम्यान सिंगापूरमध्ये दाखल झालेल्यांना तसेच ते येण्यापूर्वी चौदा दिवस अगोदर ओमिक्रॉनबाधित देशांतून आलेले किंवा गेलेल्या प्रवाशांना आरटीपीसीआर करावी लागेल.

दोन महिन्यात नवी लस

मॉडर्ना कंपनीने म्हटले की, ओमिक्रॉन व्हेरिएंटसाठी नवी लस (ओमिक्रॉन स्पेसेफिक) येत्या दोन ते तीन महिन्यांत तयार होऊ शकते. नव्या प्रकारावर सध्याच्या लशी कितपत प्रभावी ठरेल, याबाबत कोणत्याही कंपन्या ठोसपणे सांगू शकत नसल्याचे चित्र आहे. मॉडर्नाचे मुख्य वैद्यकीय अधिकारी पॉल बर्टन यांनी म्हटले की, आम्ही परिस्थितीवर लक्ष ठेवून आहोत. सध्या आम्ही एवढेच सांगू शकतो की, ओमिक्रॉनसाठी नवीन लस तयार करायची असेल तर ती दोन महिन्यांत तयार करता येऊ शकते. काही आठवड्यातच नव्या व्हेरिएंटचे चित्र स्पष्ट होईल.

फ्रान्सच्या रीयुनियन द्वीपकल्पावर ओमिक्रॉन

हिंद महासागरातील रीयूनियन द्विपकल्पावर ओमिक्रॉनचा पहिला रुग्ण असल्याची माहिती आज फ्रान्स सरकारने दिली. प्रवक्ते गॅब्रिएल अट्टल यांनी युरोप वन रेडिओ स्टेशनवर एका मुलाखतीत ओमिक्रॉनचा रुग्ण आढळल्याचे सांगितले. रीयूनियन द्विपकल्पाच्या साथरोग संशोधन केंद्राचे पॅट्रिक माविंगुई यांनी म्हटले की, ५३ वर्षीय व्यक्तीला ओमिक्रॉनचे लक्षणे आढळून आले आहेत. तो मोंझाबिकला गेला होता. रीयुनियनला येण्यापूर्वी तो दक्षिण आफ्रिकेत थांबला होता.