पेन्सिलवेनिया - अमेरिकेचे राष्ट्राध्यक्ष डोनाल्ड ट्रम्प यांनी निवडणुकीच्या पार्श्वभूमीवर अनेक धक्कादायक अशी वक्तव्ये केली आहेत. आताही त्यांनी खळबळजनक दावा करताना म्हटलं की, माझा मुलगा बॅरन फक्त 15 मिनिटात कोरोनामुक्त झाला. ट्रम्प यांनी सोमवारी पेन्सिलवेनियातील रॅलीवेळी त्यांच्या समर्थकांसोबत चर्चा करताना हा दावा केला. ट्रम्प यांनी फस्ट लेडी मेलानिया आणि मुलगा 14 वर्षीय बॅरनला ऑक्टोबरमध्ये झालेल्या कोरोना संसर्गाबद्दल बोलताना ही माहिती दिली. 

मुलाची प्रतिकारशक्ती चांगली असल्याचं सांगताना ट्रम्प यांनी डॉक्टरांसोबतच्या चर्चेचा उल्लेख केला. बॅरनची टेस्ट पॉझिटिव्ह आल्यानंतर डॉक्टरांनी दिलेली माहिती सांगितली. तेव्हा बॅरनचा कोरोना टेस्टचा रिपोर्ट पॉझिटिव्ह आल्यानंतर 15 मिनिटांनी दुसऱ्यांदा चौकशी केली तेव्हा डॉक्टरांनी धक्कादायक माहिती दिली की तो कोरोनामुक्त झाला आहे.

ट्रम्प यांनी पेन्सिलवेनियाच्या निवडणूक रॅलीमध्ये शाळा उघडण्यासाठी वातावरणनिर्मिती करण्याचा प्रयत्न केला. तेव्हा सांगितलं की, अनेक राज्ये ट्रम्प त्यांच्या विचारांशी सहमत नाहीत. आरोग्यसंबंधी काळजीमुळे शाळा उघडण्यास नाही म्हणत आहेत. देशात होत असलेल्या निवडणूक रॅलीमध्ये मुलाचा किस्सा सांगून शाळा पुन्हा उघडण्यात याव्यात यासाठी नागरिकांचे मन वळवण्याचा प्रयत्न करत आहेत.

हे वाचा - कोरोनाची लक्षणं नसलेल्या रुग्णांबाबत शास्त्रज्ञांचा मोठा खुलासा

शाळा उघडण्यासाठी ट्रम्प हालचाली करत आहेत. पण दुसऱ्या बाजुला अमेरिकेतील कोरोनाची आकडेवारी भीतीदायक आहे. अमेरिकेत 7 लाख 92 हजार कोरोनाबाधित असून 22 ऑक्टोबरपर्यंत कऱण्यात आलेल्या एका सर्व्हेक्षणानुसार अशी माहिती समोर आली की यापैकी मुलांची संख्या 11 टक्के इतकी आहे.

अमेरिकेतील खूपच कमी राज्यांनी रुग्णालयात दाखल होणाऱ्या आणि मृत्यू होणाऱ्या रुग्णांचा डेटा वयाच्या आधारे तयार केला आहे. मात्र कोरोनामुळे मृत्यू होणाऱ्या मुलांची संख्या खूपच कमी असल्याचं नोंदवलं आहे. रुग्णालयात दाखल झालेल्यांमध्ये मुलांचे प्रमाण हे केवळ 1 ते 3.6 टक्के इतकं होतं. तर मृत्यूचे प्रमाण 0.23 टक्क्यांपर्यंत होतं. तब्बल 16 राज्यांनी त्यांच्याकडे कोरोनामुळे मुलांचा मृत्यू झाला नसल्याचे सांगितले आहे.