एलॉन मस्कची बहुचर्चित आणि प्रसिद्ध कार कंपनी टेस्ला भारतात आणण्यासाठी गेल्या अनेक वर्षांपासून प्रयत्न सुरू आहेत. पण टेस्ला भारतात नक्की कधी येणार याबाबत अनेक संभ्रम आहेत. अनेक भारतीयांनाही या कारची प्रतिक्षा आहे. या सगळ्यातच आता खुद्द एलॉन मस्कनेच टेस्ला भारतात कधी येणार याचं उत्तर दिलं आहे. (Elon Musk about launching Tesla cars in India)

एलॉन मस्कच्या (Elon Musk) निर्णयामुळे आता भारतीयांना टेस्लाच्या इलेक्ट्रिक कारसाठी अधिक काळ प्रतिक्षा करावी लागणार आहे. भारत जोपर्यंत टेस्लाने(Tesla Cars in India) बनवलेल्या कार भारतात विकण्याची परवानगी देत नाही, तोवर भारतात नव्या कार बनवणार नसल्याचं सांगितलं आहे. मस्कने शुक्रवारी ट्विट करत याबद्दल माहिती दिली आहे. त्यामुळे आता टेस्ला कार वापरण्याच्या इच्छेला लगाम लागणार आहे.

भारत सरकारने (Government of India) टेस्लाला परवानगी देण्यासाठी अट ठेवली आहे. टेस्ला फक्त भारतात तयार केलेल्या इलेक्ट्रिक गाड्याच भारतात विकू शकेल, अशी भूमिका सरकारने घेतली आहे. त्यामुळे टेस्ला आणि भारत सरकार यांच्यातला करार रखडला आहे. टेस्लाला भारतात कार विकायच्या असतील तर भारतात कारखान सुरू करावा लागेल, अशी अट भारत सरकारने घातली आहे. चीनमध्ये बनवलेल्या टेस्लाच्या कार भारतात विकल्या जाणार नाहीत, असं भारतानं स्पष्ट केलं आहे.