न्यूयॉर्क - भारतीय परंपरांचा अभिमान असणाऱ्यांसाठी एक आनंदाची बातमी आहे. जगातील भारताबाहेरील पहिले योग विद्यापीठ अमेरिकेमध्ये सुरू झाले आहे. या विद्यापीठात भारतीय प्राचीन योग परंपरेचा वैज्ञानिक दृष्टिकोनातून संशोधनात्मक अभ्यास करण्यात येणार आहे. 

आंतरराष्ट्रीय योग दिन नुकताच जगभर साजरा करण्यात आला. त्या पार्श्‍वभूमीवर अमेरिकेत विवेकानंद योग विद्यापीठ सुरू करण्यात आले आहे. न्यूयॉर्कमधील भारतीय वकिलातीमध्ये या विद्यापीठाचे उद्‌घाटन मंगळवारी झाले. परराष्ट्र राज्यमंत्री व्ही. मुरलीधरन आणि परराष्ट्र मंत्रालयाच्या स्थायी समितीचे अध्यक्ष पी. पी. चौधरी यांच्या हस्ते ऑनलाईन उद्‌घाटन झाले. जयपूर फूट अमेरिका विभागाचे अध्यक्ष आणि विद्यापीठाचे संस्थापक-संचालक प्रेम भंडारी, वाणिज्यदूत संदीप चक्रवर्ती या वेळी उपस्थित होते. स्वामी विवेकानंद योग अनुसंधान संस्थेचे कुलगुरू, प्रसिद्ध योगगुरू डॉ. एच. आर. नागेंद्र हे या विद्यापीठाचे पहिले अध्यक्ष आहेत. 

लॉकडाउन मागे घेतल्यानंतर कोरोना संसर्गाचे प्रमाण दुप्पट झाले वाचा सविस्तर..

मुरलीधरन म्हणाले, "हे विद्यापीठ अमेरिका आणि भारतामध्ये बंधुत्वाचा पूल तयार करेल. भारताबाहेर प्रथमच असे विद्यापीठ साकारत असले तरी, येथूनच योगाचा संदेश जगभर जाईल.' 

अभ्यासक्रम 24 ऑगस्टपासून 
या विद्यापीठासाठी भारतातील संस्थेतून प्रशिक्षकांची नियुक्ती करण्यात आली आहे. विद्यापीठाकडून ऑनलाईन "मास्टर इन योगा' हा अभ्यासक्रम राबविण्यात येणार आहे. याठिकाणी प्रवेश सुरू झाले असून विद्यापीठाचा पहिला दिवस 24 ऑगस्ट रोजी भरणार आहे. विद्यापीठाच्या परवानगीसाठी नोव्हेंबर 2019 मध्ये प्रस्ताव देण्यात आला होता. त्याला मान्यता मिळाल्यानंतर तीनच महिन्यांत हे विद्यापीठ सुरू झाले आहे.