इस्रायलॉ एका बाजूला हमास आणि दुसऱ्या बाजूला हिजबुल्लाहसोबत लढत आहे. इस्त्रायली लष्कराने मंगळवारी लेबनॉनची राजधानी बेरूतमध्ये हिजबुल्लाह कमांडरला लक्ष्य केले. इस्रायलच्या या हवाई हल्ल्यात हिजबुल्लाहचा सर्वोच्च कमांडर मारला गेला आहे.

गोलान हाइट्समधील हल्ल्याला हिजबुल्लाह कमांडर जबाबदार असल्याचे इस्रायली लष्कराने म्हटले आहे, ज्यात 12 इस्रायली मुले मारली गेली होती.

एका इस्रायली अधिकाऱ्याने सांगितले की, हेजबुल्लाहचा सर्वोच्च लष्करी कमांडर फुआद शुकूर हे लक्ष्य होते. त्यामुळे लेबनॉनमध्ये कार्यरत असलेल्या हिजबुल्लाह या दहशतवादी संघटनेसोबत इस्रायलचा तणाव वाढला आहे.

माजदल शम्स शहरात शनिवारी झालेल्या रॉकेट हल्ल्यासाठी इस्रायलने हिजबुल्लाहला जबाबदार धरले. मात्र, दहशतवादी संघटनेने या हल्ल्यातील आपली भूमिका नाकारली आहे.

इस्रायलचे संरक्षण मंत्री योव गॅलंट यांनी मंगळवारच्या हल्ल्यानंतर लगेचच सोशल मीडिया प्लॅटफॉर्म 'X' वर एका पोस्टमध्ये लिहिले की, "हिजबुल्लाने आपली मर्यादा ओलांडली आहे."

लेबनॉनच्या सरकारी वृत्तसंस्थेने सांगितले की, ड्रोन हल्ल्यात तीन रॉकेट डागण्यात आले, त्यात एक महिला ठार झाली आणि अनेक जण जखमी झाले. जखमींपैकी काहींची प्रकृती चिंताजनक आहे.

वृत्तसंस्थेने दिलेल्या माहितीनुसार, जखमींना जवळच्या रुग्णालयात दाखल करण्यात आले आहे. स्फोटाच्या ठिकाणी असलेल्या बहमन हॉस्पिटलने लोकांना रक्तदान करण्याचे आवाहन केले आहे.

हिजबुल्लाच्या एका अधिकाऱ्याने सांगितले की, इस्त्रायली हवाई हल्ल्याने मंगळवारी संध्याकाळी बेरूतच्या दक्षिणेकडील हिजबुल्लाच्या गढीला धडक दिली, ज्यामुळे नुकसान झाले.

इस्त्रायल आणि हिजबुल्लाह यांच्यातील तणावाच्या पार्श्वभूमीवर भारताने लेबनॉनमधील नागरिकांना सावधगिरी बाळगण्याचा आणि तेथे प्रवास टाळण्याचा सल्ला दिला आहे.

दूतावासाने लेबनॉनमधील भारतीय नागरिकांसाठी आपत्कालीन फोन नंबर आणि ईमेल आयडी जारी केला आहे.

भारतीय दूतावासाने एक ॲडव्हायझरी जारी करून म्हटले आहे की, लेबनॉनमध्ये राहणाऱ्या सर्व भारतीय नागरिकांना आणि लेबनॉनला जाण्याची योजना आखणाऱ्यांनी सावधगिरी बाळगावी आणि त्यांचा ईमेल आयडी cons.beirut@mea.gov.in किंवा आपत्कालीन फोन नंबर +96176860128 द्वारे बेरूतमधील भारतीय दूतावासाशी संपर्क साधावा.