GDP: भारताच्या एकूण देशांतर्गत उत्पादन (जीडीपी) वाढीचा वेग २०२६ पर्यंत सात टक्क्यांपर्यंत वाढेल, तर चीनच्या वाढीचा वेग ४.६ टक्के असेल, असा अंदाज ‘एस अँड पी ग्लोबल रेटिंग्ज’ या पतमानांकन संस्थेने म्हटले आहे. ‘चायना स्लोज इंडिया ग्रोज’ या अहवालात ही माहिती देण्यात आली आहे.

आशिया-प्रशांत क्षेत्राच्या वाढीला चालना देणारे केंद्र आता चीनमधून दक्षिण आणि आग्नेय आशियामध्ये स्थलांतरित होण्याची अपेक्षाही या अहवालात व्यक्त करण्यात आली आहे. चीनचा ‘जीडीपी’ २०२४ मध्ये ४.६ टक्क्यांपर्यंत, तर २०२५ मध्ये ४.८ टक्क्यांपर्यंत आणि २०२६ मध्ये ४.६ टक्क्यांपर्यंत वाढेल असा अंदाज आहे,

तर चालू आर्थिक वर्षात भारताचा ‘जीडीपी’ ६.४ टक्क्यांपर्यंत, २०२५ साठी ६.९ टक्के, त्यानंतर २०२६ मध्ये सात टक्क्यांपर्यंत वाढेल, असे या अहवालात म्हटले आहे.

या क्षेत्रातील महत्त्वाची अर्थव्यवस्था असलेल्या व्हिएतनामचा ‘जीडीपी’ ६.८ टक्के आणि इंडोनेशियाचा विकासदर पाच टक्क्यांवर स्थिर असेल, असेही ‘एस अँड पी ग्लोबल’ने या अहवालात नमूद केले आहे. आशिया प्रशांत क्षेत्रातील देशांच्या मध्यवर्ती बँका व्याजदर उच्च ठेवण्याची शक्यता आहे.

त्यामुळे या भागातील कर्जे महागतील. त्याच वेळी, पश्चिम आशियातील भू-राजकीय संघर्षाचा जागतिक पुरवठा साखळीवर परिणाम होईल, त्यामुळे ऊर्जा खर्च, महागाई वाढण्याची शक्यता आहे. महागाईमुळे मागणी कमी होण्याचाही धोका आहे.

मंदावलेल्या जागतिक मागणीचाही आशिया-प्रशांत क्षेत्राच्या वाढीवर परिणाम जाणवेल, असेही ‘एस अँड पी’ने म्हटले आहे. या क्षेत्राच्या वाढीचा दर २०२४ साठी ४.४ टक्क्यांवरून ४.२ टक्क्यांवर आणला असल्याचेही या अहवालात म्हटले आहे.